അഗാര്‍ക്കറുടെ 'നോ', നാല് വര്‍ഷം നീണ്ട കാത്തിരിപ്പ്; ഒടുവില്‍ തിരിച്ചെത്തി ഭുവനേശ്വര്‍

മുംബൈ: കാത്തിരിപ്പിനൊടുവില്‍ സീനിയര്‍ പേസര്‍ ഭുവനേശ്വര്‍ കുമാര്‍ വീണ്ടും നീലക്കുപ്പായത്തിലേക്ക് തിരികെയെത്തുകയാണ്. ഏകദേശം നാല് വര്‍ഷത്തെ ഇടവേളയ്ക്ക് ശേഷമാണ് 36കാരനായ സ്വിങ് മാന്ത്രികന്‍ വരാനിരിക്കുന്ന ന്യൂസിലാന്‍ഡ് പര്യടനത്തിനുള്ള ഇന്ത്യന്‍ ടി20 ടീമില്‍ ഇടംനേടിയത്. ഇത്രയും നാള്‍ മികച്ച പ്രകടനം പുറത്തെടുത്തിട്ടും ഭുവനേശ്വര്‍ ടീമിന് പുറത്തിരിക്കേണ്ടി വന്നതിന് പിന്നില്‍ സെലക്ഷന്‍ കമ്മിറ്റി മുന്‍ ചെയര്‍മാന്‍ അജിത് അഗാര്‍ക്കറുടെ കടുംപിടുത്തമായിരുന്നുവെന്നാണ് പുതിയ റിപ്പോര്‍ട്ടുകള്‍ വ്യക്തമാക്കുന്നത്.

ആഭ്യന്തര ക്രിക്കറ്റിലും ഐപിഎല്ലിലും മിന്നും ഫോമിലായിരുന്നിട്ടും അനുഭവസമ്പന്നരായ മുതിര്‍ന്ന താരങ്ങള്‍ക്ക് വീണ്ടും അവസരം നല്‍കാന്‍ അജിത് അഗാര്‍ക്കര്‍ തയ്യാറായിരുന്നില്ല. റോയല്‍ ചലഞ്ചേഴ്‌സ് ബംഗളൂരുവിന്റെ തുടര്‍ച്ചയായ ഐപിഎല്‍ കിരീടനേട്ടങ്ങളില്‍ നിര്‍ണായക പങ്കുവഹിച്ച ഭുവനേശ്വര്‍ കുമാര്‍, കഴിഞ്ഞ സീസണില്‍ മാത്രം 17 വിക്കറ്റുകള്‍ സ്വന്തമാക്കിയിരുന്നു. പവര്‍പ്ലേകളില്‍ പുതുതലമുറ ബാറ്റര്‍മാരെ പോലും സവിശേഷമായ സ്വിങ് കൊണ്ട് വിറപ്പിച്ച ഭുവിയെ ടീമിലെടുക്കാന്‍ സെന്‍ട്രല്‍ സോണ്‍ സെലക്ടറായ ആര്‍പി സിങ് പലതവണ ആവശ്യപ്പെട്ടിരുന്നെങ്കിലും അഗാര്‍ക്കറുടെ പിന്തുണ ലഭിച്ചില്ല.

എന്നാല്‍, അഗാര്‍ക്കര്‍ സ്ഥാനമൊഴിയുകയും പ്രഗ്യാന്‍ ഓജ താത്കാലിക ചെയര്‍മാനായി ചുമതലയേല്‍ക്കുകയും ചെയ്തതോടെ ഭുവനേശ്വറിന്റെ തിരിച്ചുവരവിന് വഴിയൊരുങ്ങി. പ്രഗ്യാന്‍ ഓജയും മറ്റ് സെലക്ടര്‍മാരും ഭുവിയുടെ പരിചയസമ്പത്തിന് അര്‍ഹിച്ച പ്രാധാന്യം നല്‍കുകയായിരുന്നു. ജസ്പ്രീത് ബുംറയുടെ അഭാവത്തില്‍ പവര്‍പ്ലേയിലും ഡെത്ത് ഓവറുകളിലും നിയന്ത്രണം ഏറ്റെടുക്കാന്‍ ഭുവനേശ്വറിന്റെ സാന്നിധ്യം ടീമിന് വലിയ കരുത്താകും. ഒപ്പം, 2028ലെ ടി20 ലോകകപ്പ് ലക്ഷ്യമിട്ട് ഉയര്‍ന്നുവരുന്ന മയാങ്ക് യാദവ്, പ്രിന്‍സ് യാദവ് തുടങ്ങിയ യുവ പേസര്‍മാര്‍ക്ക് കൃത്യമായ മാര്‍ഗനിര്‍ദ്ദേശം നല്‍കാനും വെറ്ററന്‍ താരത്തിന് സാധിക്കും.

ഇന്ത്യയ്ക്കായി 21 ടെസ്റ്റുകളിലും 121 ഏകദിനങ്ങളിലും 87 ടി20 മത്സരങ്ങളിലും കളിച്ചിട്ടുള്ള ഭുവനേശ്വര്‍, അന്താരാഷ്ട്ര ടി20യില്‍ 90 വിക്കറ്റുകള്‍ നേടിയിട്ടുണ്ട്. ഭുവനേശ്വറിന്റെ ഈ തിരിച്ചുവരവ് പരിക്കിന്റെ പിടിയിലായി പുറത്തിരിക്കുന്ന മുഹമ്മദ് ഷമി അടക്കമുള്ള മറ്റ് സീനിയര്‍ താരങ്ങള്‍ക്കും വലിയ പ്രതീക്ഷയാണ് നല്‍കുന്നത്. ഒക്ടോബര്‍ 22 മുതല്‍ നവംബര്‍ 1 വരെയാണ് അഞ്ച് മത്സരങ്ങളടങ്ങിയ ന്യൂസിലാന്‍ഡ് പര്യടനത്തിലെ ടി20 പരമ്പര നടക്കുന്നത്. ക്രൈസ്റ്റ്ചര്‍ച്ചിലാണ് ആദ്യ മത്സരം.

• ന്യൂസിലാന്‍ഡ് പര്യടനത്തിനുള്ള ഇന്ത്യന്‍ ടി20 സ്‌ക്വാഡ്: ശ്രേയസ് അയ്യര്‍ (ക്യാപ്റ്റന്‍), അഭിഷേക് ശര്‍മ, സഞ്ജു സാംസണ്‍ (വിക്കറ്റ് കീപ്പര്‍), വൈഭവ് സൂര്യവംശി, ഇഷാന്‍ കിഷന്‍ (വിക്കറ്റ് കീപ്പര്‍), തിലക് വര്‍മ്മ (വൈസ് ക്യാപ്റ്റന്‍), അക്‌സര്‍ പട്ടേല്‍, ശിവം ദുബെ, നിതീഷ് കുമാര്‍ റെഡ്ഡി, നമ്മന്‍ ധിര്‍, പ്രിന്‍സ് യാദവ്, മയാങ്ക് യാദവ്, അര്‍ഷ്ദീപ് സിങ്, ഭുവനേശ്വര്‍ കുമാര്‍, വരുണ്‍ ചക്രവര്‍ത്തി, കുല്‍ദീപ് യാദവ്.