വീണ്ടും ഇന്ത്യ- പാക് ബ്ലോക്ക്ബസ്റ്റര്‍; വീണ്ടും കൈ കൊടുക്കാതെ ക്യാപ്റ്റന്‍മാര്‍

ബുലവായോ: ഇന്ത്യയും പാകിസ്ഥാനും തമ്മിലുള്ള ആഭ്യന്തര, രാഷ്ട്രീയ പ്രശ്‌നങ്ങള്‍ തുടരുന്നതിനിടെ ക്രിക്കറ്റ് പിച്ചില്‍ വീണ്ടും കൈകൊടുക്കാതെ ഇന്ത്യ- പാക് താരങ്ങള്‍. അണ്ടര്‍ 19 ലോകകപ്പ് പോരാട്ടത്തിലെ സൂപ്പര്‍ സിക്‌സ് മത്സരത്തിന്റെ ടോസ് സമയത്താണ് ഇന്ത്യന്‍ ക്യാപ്റ്റന്‍ ആയുഷ് മാത്രെയും പാകിസ്ഥാന്‍ ക്യാപ്റ്റന്‍ ഫര്‍ഹാന്‍ യൂസഫും ഹസ്തദാനത്തിനു വിസമ്മതിച്ചത്.

സമീപ കാലത്ത് സീനിയര്‍, വനിതാ ക്രിക്കറ്റ് പോരാട്ടങ്ങളിലും ഇതേ സമീപനം തന്നെയാണ് ഇന്ത്യ എടുക്കുന്നത്. അണ്ടര്‍ 19 പോരിലും ഈ രീതി തന്നെ തുടര്‍ന്നു. മത്സരം കഴിഞ്ഞാലുള്ള താരങ്ങളുടെ ഹസ്തദാനവും ഈ മത്സരത്തിലുമുണ്ടാകില്ല.

മത്സരത്തില്‍ ടോസ് നേടി പാകിസ്ഥാന്‍ ഇന്ത്യയെ ആദ്യം ബാറ്റ് ചെയ്യാന്‍ അയച്ചു. ഒടുവില്‍ വിവരം കിട്ടുമ്പോള്‍ ഇന്ത്യ 4 വിക്കറ്റ് നഷ്ടത്തില്‍ 133 റണ്‍സെന്ന നിലയില്‍.