''മെസി പിഎസ്ജിയിലേക്ക് വന്നാല്‍ പാചകക്കാരന്‍ ആയിട്ടെങ്കിലും ഇവിടെ തുടരണം''

പാരിസ്:‌ പിഎസ്ജിയിലേക്കുള്ള മെസിയുടെ വരവിനെ അനുകൂലിച്ച് എയ്ഞ്ചല്‍ ഡി മരിയ. മെസിയുടെ ട്രാന്‍സ്ഫര്‍ സാധ്യത ആരാധകരെ മാത്രമല്ല കളിക്കാരേയും എക്‌സൈറ്റ് ചെയ്യിക്കുന്നു എന്ന് വ്യക്തമാക്കിയാണ് പിഎസ്ജി താരത്തിന്റെ വാക്കുകള്‍. 

ക്ലബ് ഫുട്‌ബോളില്‍ മെസിക്കൊപ്പം കളിക്കുക എന്നത് സ്വപ്‌നമാണ്. അര്‍ജന്റീനയ്ക്ക് വേണ്ടി കളിക്കുമ്പോള്‍ ചുരുങ്ങിയ സമയം മാത്രമാണ് ഒപ്പമുണ്ടാവുന്നത്. എല്ലാ ദിവസവും മെസി എനിക്ക് അരികില്‍ ഉണ്ടാവണം എന്നതാണ് സ്വപ്‌നം...

ബാഴ്‌സയിലേക്ക് പോകാന്‍ ഒരിക്കല്‍ എനിക്ക് അവസരമുണ്ടായി. എന്നാല്‍ സാധ്യമായില്ല. ഇപ്പോള്‍ മെസിക്കൊപ്പം കളിക്കാന്‍ മറ്റൊരു അവസരം തുറന്നു വരികയാണ്. പക്ഷേ ഇവിടെ എന്റെ കരാര്‍ അവസാനിക്കുന്നു. എന്താണ് സംഭവിക്കുക എന്ന് അറിയില്ല. മെസിക്കൊപ്പം കളിക്കാനായാല്‍ അതില്‍പ്പരം സന്തോഷമില്ലെന്നും എയ്ഞ്ചല്‍ ഡി മരിയ പറയുന്നു. 

ലിയോ പിഎസ്ജിയിലേക്ക് വന്നാല്‍ പചാകക്കാരന്‍ ആയിട്ടെങ്കിലും ഞാന്‍ ഇവിടെ തുടരണം എന്നാണ് എന്റെ ഭാര്യ പറയുന്നത്. ആ വാക്കുകളിലുണ്ട് എല്ലാം. മെസിക്കൊപ്പം കളിക്കുന്നതിനേക്കാള്‍ വലുതായി ഒന്നും ഫുട്‌ബോള്‍ ലോകത്ത് നിന്ന് ലഭിക്കാനില്ല. ക്രിസ്റ്റ്യാനോ, നെയ്മര്‍, എംബാപ്പെ എന്നിവര്‍ക്കൊപ്പം കളിക്കാനായി. മെസിക്കൊപ്പവും കളിക്കാനായാല്‍ ഞാന്‍ സന്തോഷത്തോടെ വിരമിക്കും...ഏയ്ഞ്ചല്‍ ഡി മരിയ പറഞ്ഞു.