ദുബായ്: നാലാം സ്ഥാനം പിടിച്ച് പ്ലേഓഫ് ഉറപ്പിക്കാനായി പൊരുതുന്ന നാല് ടീമിൽ മൂന്ന് പേർ കളത്തിലിറങ്ങുന്നതോടെ ഐപിഎല്ലിൽ ഇന്ന് സൂപ്പർ സൺഡേ. കിങ്സ് ഇലവൻ പഞ്ചാബ് ടൂർണമെന്റിൽ നിന്ന് പുറത്തായ ചെന്നൈയേ നേരിടുമ്പോൾ കൊൽക്കത്തയ്ക്ക് എതിരെയാണ് രാജസ്ഥാന്റെ വരവ്.

ചെന്നൈക്കെതിരെ ജയിച്ചാൽ പഞ്ചാബിന് 14 പോയിന്റ് ആവും. കൊൽക്കത്ത-രാജസ്ഥാൻ മത്സരത്തിൽ ജയിക്കുന്നതാരോ അവർക്കും 14 പോയിന്റ്. നെറ്റ്റൺറേറ്റ് ആവും ഇവിടെ പിന്നെയുള്ള വിധി നിർണയിക്കുക. നാളെയാണ് ഹൈദരാബാദിന്റെ കളി.

പഞ്ചാബ് ചെന്നൈക്കെതിരെ ഒരു റൺസിനെങ്കിലും ജയം പിടിച്ചു കഴിഞ്ഞാൽ പിന്നെ കൊൽക്കത്ത-രാജസ്ഥാൻ മത്സരത്തിലെ വിജയി 65 റൺസിനെങ്കിലും ജയിച്ചു കയറണം. ചെന്നൈക്ക് മുൻപിൽ തോൽക്കുകയും, രാജസ്ഥാൻ അല്ലെങ്കിൽ കൊൽക്കത്ത ഏകപക്ഷീയ ജയം നേടുകയും, ചൊവ്വാഴ്ച ഹൈദരാബാദ് മുംബൈയെ തോൽപ്പിക്കുകയും ചെയ്താൽ പഞ്ചാബ് പുറത്താവും.

14 പോയിന്റ് വീതം നേടി രണ്ടും മൂന്നും സ്ഥാനത്ത് നിൽക്കുന്ന ബാംഗ്ലൂരിനും രാജസ്ഥാനും പ്ലേഓഫ് ഉറപ്പിക്കാൻ വേണ്ടത് ഒരു ജയമാണ്. നാളെ ബാംഗ്ലൂരും ഡൽഹിയും നേർക്കുനേർ വരുന്നതോടെ ഇക്കാര്യത്തിൽ തീരുമാനമാകും.