ന്യൂഡല്‍ഹി: ഡിസംബര്‍ 16ന് ഇന്ത്യന്‍ സംഘം സൗത്ത് ആഫ്രിക്കന്‍ പര്യടനത്തിനായി തിരിക്കുമെന്ന് സൂചന. ടെസ്റ്റ്, ഏകദിന പരമ്പരക്കായി 44 ദിവസം ഇന്ത്യന്‍ സംഘം ബയോ ബബിളില്‍ കഴിയും. 

സൗത്ത് ആഫ്രിക്കയില്‍ എത്തുന്ന ഇന്ത്യന്‍ സംഘം ടെസ്റ്റ് പരമ്പര അവസാനിക്കുന്നത് വരെ ബയോ ബബിളില്‍ തുടരും. ഏകദിന പരമ്പരയും കളിക്കുന്ന താരങ്ങള്‍ എട്ട് ദിവസം കൂടി ബയോ ബബിളില്‍ തുടരണം. നിലവില്‍ ന്യൂസിലാന്‍ഡ് പര്യടനം കഴിഞ്ഞ് ഇടവേളയിലാണ് ഇന്ത്യന്‍ താരങ്ങള്‍. സൗത്ത് ആഫ്രിക്കന്‍ പര്യടനത്തിന് മുന്‍പായി മുംബൈയില്‍ ടീം അംഗങ്ങളും സപ്പോര്‍ട്ട് സ്റ്റാഫും ഇന്ന് ബയോ ബബിളില്‍ പ്രവേശിക്കും. 

ബോക്‌സിങ് ഡേ ടെസ്‌റ്റോടെയാണ് പരമ്പരക്ക് തുടക്കം

മൂന്ന് ടെസ്റ്റുകളുടെ പരമ്പരക്കുള്ള 18 അംഗ ഇന്ത്യന്‍ ടീമിനെ ബിസിസിഐ പ്രഖ്യാപിച്ചിരുന്നു. സെഞ്ചൂറിയനില്‍ ബോക്‌സിങ് ഡേ ടെസ്‌റ്റോടെയാണ് പരമ്പരക്ക് തുടക്കം. ജനുവരി 3-7 തിയതികളിലായാണ് ജോഹന്നാസ്ബര്‍ഗില്‍ നടക്കുന്ന രണ്ടാമത്തെ ടെസ്റ്റ്. മൂന്നാമത്തേത് ജനുവരി 11-15 തിയതികളിലായി കേപ്ടൗണില്‍ നടക്കും. 

ജനുവരി 19നാണ് ആദ്യ ഏകദിനം, രണ്ടാമത്തേത് ജനുവരി 21നും മൂന്നാമത്തേത് ജനുവരി 23നും. ഏകദിന മത്സരങ്ങള്‍ ഐസിസിയുടെ വേള്‍ഡ് കപ്പ് സൂപ്പര്‍ ലീഗിന്റെ ഭാഗമാണ്.