ദുബായ്: ക്യാപ്റ്റൻ കൂൾ എന്നാണ് ചെന്നൈ സൂപ്പർ കിങ്സ് നായകൻ എംഎസ് ധോനി അറിയപ്പെടുന്നത്. എന്നാൽ വളരെ അപൂർവം അവസരങ്ങളിൽ ധോനിയുടെ ആ കൂൾ അവസ്ഥ കെട്ടുപൊട്ടി പുറത്താകുന്നതും ആരാധകർ കണ്ടിട്ടുണ്ട്. ഇടവേളയ്ക്ക് ശേഷം അത്തരമൊരു രം​ഗം വീണ്ടും കണ്ടു. ഐപിഎൽ രണ്ടാം ഘട്ടത്തിലെ ആദ്യ മത്സരത്തിൽ മുംബൈ ഇന്ത്യൻസിനെതിരെ ധോനി സംയമനം വിടുന്നതാണ് ആരാധകർ കണ്ടത്. 

മുംബൈ ബാറ്റിങിനിടെ ഡ്വെയ്‌ൻ ബ്രാവോയുമായുള്ള ഫീൽഡിങിലെ ആശയക്കുഴപ്പത്തിൽ ക്യാച്ച് പാഴായതാണ് ധോനിയെ പ്രകോപിപ്പിച്ചത്. ദീപക് ചഹർ എറിഞ്ഞ 18-ാം ഓവറിലെ നാലാം പന്തിലാണ് സംഭവം. 

മുംബൈക്ക് ജയിക്കാൻ ആ സമയത്ത് വേണ്ടിയിരുന്നത് 15 പന്തിൽ 42 റൺസായിരുന്നു. ദീപക് ചഹറിനെ സ്‌കൂപ്പ് ചെയ്യാൻ സൗരഭ് തിവാരി ശ്രമിച്ചു. ക്യാച്ചിനായി ധോനിയും ഷോർട് ഫൈൻ ലെ​ഗിൽ ഫീൽഡ് ചെയ്ത ബ്രാവോയും ഒരിടത്തേക്ക് ഓടിയടുത്തു. എന്നാൽ പന്ത് നിലത്തു വീണു. ക്യാച്ച് പാഴായത് ധോനിയെ അസ്വസ്ഥനാക്കി. എന്താണ് കാട്ടിയത് എന്ന ആംഗ്യത്തോടെയായിരുന്നു ബ്രാവോയുടെ നേർക്കുള്ള ധോനിയുടെ ആ സമയത്തെ പ്രതികരണം. 

മുംബൈ നിരയിൽ മികവോടെ ബാറ്റേന്തിയ തിവാരിയെ പുറത്താക്കാനുള്ള സുവർണാവസരം നഷ്ടമായതിന്റെ നിരാശയായിരുന്നു ധോനിക്ക് ആ സമയത്ത്. എന്നാൽ തിവാരിയുടെ ക്യാച്ച് നിലത്തിട്ടത് ചെന്നൈയ്ക്ക് തലവേദനയായില്ലെന്ന് മത്സരം ഫലം വ്യക്തമാക്കുന്നു.