'കൊറോള പോലെ തുടങ്ങി, അവസാനിച്ചത് ഫെരാരിയായി'; കോഹ്‌ലിയുടെ ഇന്നിങ്‌സില്‍ ദിനേശ് കാര്‍ത്തിക്‌

ചെന്നൈ: ഇംഗ്ലണ്ടിനെതിരായ മൂന്നാം ടി20യിലെ വിരാട് കോഹ് ലിയുടെ ബാറ്റിങ്ങിനെ പ്രശംസയില്‍ മൂടി ദിനേശ് കാര്‍ത്തിക്. കൊറോള കാറിനേയും ഫെരാരിയേയുമാണ് കോഹ്‌ലിയുടെ ഇന്നിങ്‌സിനോട് കാര്‍ത്തിക് താരതമ്യം ചെയ്യുന്നത്. 

കൊറോള പോലെ തുടങ്ങി ഫെരാരിയായി അവസാനിച്ചു എന്നാണ് കിങ് കോഹ് ലി എന്ന ഹാഷ് ടാഗോടെ ദിനേശ് കാര്‍ത്തിക് ട്വിറ്ററില്‍ കുറിച്ചത്. മൂന്നാം ടി20യില്‍ 46 പന്തില്‍ നിന്ന് 8 ഫോറും, നാല് സിക്‌സും പറത്തി കോഹ് ലി 77 റണ്‍സ് നേടി. എന്നാല്‍ തുടക്കത്തില്‍ മറ്റ് ഇന്ത്യന്‍ ബാറ്റ്‌സ്മാന്മാരെ പോലെ റണ്‍സ് കണ്ടെത്താന്‍ കോഹ് ലി വിഷമിച്ചിരുന്നു. 

ആദ്യ 23 പന്തില്‍ 23 റണ്‍സ് നേടിയ കോഹ് ലി പിന്നെ വന്ന 23 പന്തില്‍ നിന്നും അടിച്ചെടുത്തത് 54 റണ്‍സ്. അണ്‍ഓര്‍ത്തഡോക്‌സ് ഷോട്ടുകളും, ക്ലാസിക് ഡ്രൈവുകളുമായി കോഹ് ലി തുടരെ രണ്ടാം മത്സരത്തിലും അര്‍ധ ശതകം പിന്നിട്ടു.