വേദന കൊണ്ട് പുളഞ്ഞ് ബുമ്റ; ബൗളിങിനിടെ പരിക്ക്; ഇന്ത്യക്ക് ആശങ്ക (വീഡിയോ)

സെഞ്ചൂറിയൻ: ദക്ഷിണാഫ്രിക്കക്കെതിരായ ഒന്നാം ക്രിക്കറ്റ് ടെസ്റ്റിൽ ഇന്ത്യക്ക് ആശങ്കയായി പേസർ ജസ്പ്രിത് ബുമ്റയുടെ പരിക്ക്. ബൗളിങ്ങിനിടെയാണ് താരത്തിന് പരിക്കേറ്റത്. ഇതോടെ ബുമ്റയെ മത്സരത്തിന്റെ തുടക്കത്തിൽത്തന്നെ പിൻവലിക്കേണ്ടി വന്നത് ഇന്ത്യയ്ക്കു തിരിച്ചടിയായി. 

ദക്ഷിണാഫ്രിക്കയുടെ ആദ്യ ഇന്നിങ്സിലെ 11 ഓവറിലെ അഞ്ചാം പന്ത് എറിഞ്ഞതിനു ശേഷമാണു ബുമ്റയുടെ വലതു കാലിന്റെ ഉപ്പൂറ്റിക്കു പരിക്കേറ്റത്. പന്ത് എറിഞ്ഞതിനു ശേഷമുള്ള ഫോളോ ത്രൂവിലായിരുന്നു അപകടം. വേദന കൊണ്ടു പുളഞ്ഞ ബുമ്റയ്ക്ക് ഉടൻ വൈദ്യ സഹായം ലഭ്യമാക്കി. ഇതിനു ശേഷം ടീം ഫിസിയോയ്ക്കൊപ്പം ബുമ്റ മൈതാനം വിട്ടു.

ആദ്യ ഇന്നിങ്സിൽ 5.5 ഓവർ മാത്രം ബൗൾ ചെയ്ത ബുമ്റയാണു ദക്ഷിണാഫ്രിക്കൻ ക്യാപ്റ്റൻ ഡീൻ എൽഗാറിനെ പുറത്താക്കി ഇന്ത്യയ്ക്ക് ആദ്യ ബ്രേക്ക് നൽകിയത്.