കൊച്ചി: ഐഎസ്എല്ലിലെ ഈ സീസണിലെ അവസാന മത്സരത്തിനായി കേരള ബ്ലാസ്‌റ്റേഴ്‌സ് ഇന്നിറങ്ങുന്നു. എഫ് സി ഗോവയാണ് എതിരാളികൾ. കലൂർ സ്റ്റേഡിയത്തിൽ രാത്രി 7.30 നാണ് മത്സരം ആരംഭിക്കുന്നത്. കഴിഞ്ഞ അഞ്ചു മത്സരത്തില്‍ നാല് എണ്ണത്തിലും ജയിക്കാൻ കഴിഞ്ഞത് ആരാധകരുടെ പ്രതീക്ഷയും വർധിപ്പിച്ചിട്ടുണ്ട്.

ഈ സീസണിൽ അത്ര മികച്ച പ്രകടനമല്ല ബ്ലാസ്റ്റേഴ്സിൽ നിന്നുമുണ്ടായത്. ടൂർണമെന്റിന്റെ തുടക്കത്തിൽ നിരവധി മത്സരങ്ങളിൽ തോൽവി വഴങ്ങിയതോടെ ടീം തരം താഴ്ത്തൽ ഭീഷണി നേരിട്ടിരുന്നു. എന്നാൽ, സീസണിനിടെ പരിശീലകനായി ആഷ്‌ലി വുഡ് എത്തിയതോടെയാണ് ബ്ലാസ്‌റ്റേഴ്‌സില്‍ വൻ മാറ്റമാണ് ഉണ്ടായത്. തുടർ വിജയങ്ങൾ നേടാൻ കഴിഞ്ഞതോടെ ബ്ലാസ്റ്റേഴ്‌സ് പോയിന്റ് നില മെച്ചപ്പെടുത്തുകയും ചെയ്തു.

12 കളികളിൽ നിന്ന് 14 പോയിന്റുമായി നിലവിൽ എട്ടാം സ്ഥാനത്താണ് ടീം ഇപ്പോൾ ഉള്ളത്. ഈ സീസൺ മുതൽ പോയിന്റ് പട്ടികയിൽ അവസാന സ്ഥാനത്ത് എത്തുന്ന ടീമിനെ ഐ ലീഗിലേക്ക് തരം താഴ്ത്തുമെന്ന് എഐഎഫ്എഫ് നേരത്തെ അറിയിച്ചിരുന്നു.

ഫ്രാഞ്ചു, വിക്ടര്‍ ബെര്‍തോമ്യു, മത്തിയാസ് ഹെര്‍ണാണ്ടസ്, നിഹാല്‍ സുധീഷ്, മുഹമ്മദ് അജ്‌സല്‍, ഡാനിഷ് ഫാറൂഖ്, വിബിന്‍ മോഹനന്‍ തുടങ്ങിയവരുടെ മികച്ച പ്രകടനത്തിലാണ് ബ്ലാസ്റ്റേഴ്‌സിന്റെ പ്രതീക്ഷ. യുവതാരം എബിൻ ദാസും മികച്ച ഫോമിലാണ് കളിക്കുന്നത്.