ഷാര്‍ജ: ഐപിഎല്‍ പ്ലേഓഫ് ഉറപ്പിക്കുക ലക്ഷ്യമിട്ട് കൊല്‍ക്കത്ത നൈറ്റ്‌റൈഡേഴ്‌സ് ഇന്ന് ഇറങ്ങും. രാജസ്ഥാന്‍ റോയല്‍സ് ആണ് എതിരാളികള്‍. രാജസ്ഥാന്റെ പ്ലേഓഫ് പ്രതീക്ഷകള്‍ അവസാനിച്ച് കഴിഞ്ഞു. എന്നാല്‍ രാജസ്ഥാന് എതിരെ വലിയ മാര്‍ജിനില്‍ ജയമാണ് കൊല്‍ക്കത്ത ലക്ഷ്യം വയ്ക്കുക. 

12 പോയിന്റുമായി നാലാം സ്ഥാനത്താണ് കൊല്‍ക്കത്ത. 13 കളിയില്‍ നിന്ന് മുംബൈക്കും 12 പോയിന്റുണ്ട്. എന്നാല്‍ നെറ്റ്‌റണ്‍റേറ്റിലെ മുന്‍തൂക്കം കാരണം കൊല്‍ക്കത്ത നാലാം സ്ഥാനം പിടിക്കുന്നു. കൊല്‍ക്കത്ത ഇന്ന് രാജസ്ഥാന് എതിരേയും നാളെ ഹൈദരാബാദിന് എതിരെ മുംബൈയും ജയിച്ചാല്‍ നെറ്റ്‌റണ്‍റേറ്റ് ആവും പ്ലേഓഫിലേക്ക് എത്തുന്ന നാലാമത്തെ ടീമിനെ നിര്‍ണയിക്കുക. 

അവസാന മത്സരം ജയിച്ച് അവസാനിപ്പിക്കാനാവും സഞ്ജുവും കൂട്ടരും ലക്ഷ്യമിടുക. റസലും ലോക്കി ഫെര്‍ഗൂസനും കൊല്‍ക്കത്തയ്ക്ക് വേണ്ടി പരിശീലനം നടത്തിയിരുന്നു. ഇത് കൊല്‍ക്കത്തയുടെ പ്രതീക്ഷകള്‍ കൂട്ടുന്നതാണ്. 

കൊല്‍ക്കത്തക്കെതിരെ ഇന്ന് രാജസ്ഥാനും മുംബൈക്കെതിരെ നാളെ ഹൈദരാബാദും ചെന്നൈക്കെതിരെ ഇന്ന് പഞ്ചാബും ജയിച്ചാല്‍ നാല് ടീമുകള്‍ക്ക് 12 പോയിന്റ് വീതമാവും. എന്നാല്‍ ഇതിനുള്ള സാധ്യത വിരളമാണ്.