ദോഹ: ഫിഫ ഇന്റർകോണ്ടിനന്റൽ കപ്പ് ഫുട്ബോൾ കിരീടം സ്പാനിഷ് വമ്പൻമാരായ റയൽ മാഡ്രിഡിന്. ഫൈനലിൽ മെക്സിക്കോ ക്ലബ് പച്ചുക്കയെ മറുപടിയില്ലാത്ത 3 ​ഗോളുകൾക്ക് വീഴ്ത്തിയാണ് റയൽ കിരീടത്തിൽ മുത്തമിട്ടത്. കിലിയൻ എംബാപ്പെ, വിനിഷ്യസ് ജൂനിയർ, റോഡ്രി​ഗോ എന്നിവർ റയലിനായി വല ചലിപ്പിച്ചു.

കളിയിൽ റയലിന്റെ സമ്പൂർണ ആധിപത്യമായിരുന്നു. കളിയുടെ 37ാം മിനിറ്റിൽ എംബാപ്പെയാണ് ​ഗോളടി തുടങ്ങിയത്. വിനിഷ്യസിന്റെ ക്രോസിൽ നിന്നായിരുന്നു ​ഗോളിന്റെ പിറവി. ശേഷിച്ച രണ്ട് ​ഗോളുകളും രണ്ടാം പകുതിയിലായിരുന്നു.

ആദ്യ ​ഗോൾ നേടിയ എംബാപ്പെ രണ്ടാം ​ഗോളിനു വഴിയൊരുക്കി. 53ാം മിനിറ്റിൽ ഫ്രഞ്ച് സൂപ്പർ താരത്തിന്റെ പാസിൽ നിന്നു റോഡ്രി​ഗോയാണ് വല ചലിപ്പിച്ചത്. വാർ പരിശോധനയിലാണ് ​ഗോൾ അനുവദിച്ചത്.

'അശ്വിന്റെ വിരമിക്കല്‍ അനവസരത്തില്‍, അല്‍പം കൂടി കാത്തിരിക്കാമായിരുന്നു'

ഒടുവിൽ 83ാം മിനിറ്റിൽ മൂന്നാം ​ഗോൾ. റയലിനു അനുകൂലമായി ലഭിച്ച പെനാൽറ്റിയാണ് ​ഗോളായി മാറിയത്.

റയൽ താരം ലുക്കാസ് വാസ്ക്വസിനെ പച്ചുക്ക താരം ഇദ്രിസി ഫൗൾ ചെയ്തതിനാണ് റഫറി പെനാൽറ്റി അനുവദിച്ചത്. ഏറെ നേരത്തെ വാർ പരിശോധനയ്ക്കൊടുവിലാണ് റഫറി പെനാൽറ്റി അനുവദിച്ചത്. കിക്കെടുത്ത വിനിഷ്യസിനു പിഴച്ചില്ല.