മെസിയുടെ ആരാധനാപാത്രം, മെന്റര്‍; ലുസൈല്‍ ഇരമ്പിയാര്‍ത്തപ്പോള്‍ പൊട്ടിക്കരഞ്ഞ് എയ്മര്‍(വീഡിയോ)

ദോഹ: മെക്‌സിക്കോയ്ക്ക് എതിരെ ആദ്യ പകുതിയില്‍ 25 ടച്ചുകളാണ് മെസിയില്‍ നിന്ന് വന്നത്. എന്നാല്‍ ബോക്‌സിനുള്ളിലേക്ക് പന്തുമായി ഇറങ്ങാന്‍ മെക്‌സിക്കന്‍ പ്രതിരോധനിര അര്‍ജന്റൈന്‍ സൂപ്പര്‍ താരത്തെ അനുവദിച്ചില്ല. ഒടുവില്‍ 64ാം മിനിറ്റില്‍ ആരാധകര്‍ കാത്തിരുന്ന നിമിഷം എത്തി. മെസിയുടെ ഗോളില്‍ ലുസൈല്‍ സ്‌റ്റേഡിയം ഇരമ്പിയാര്‍ത്തപ്പോല്‍ ഡഗൗട്ടില്‍ ഒരാള്‍ പൊട്ടിക്കരയുകയായിരുന്നു, പാബ്ലോ എയ്മര്‍...

അര്‍ജന്റീനയുടെ അസിസ്റ്റന്റ് കോച്ചായാണ് ദേശിയ ടീമിലെ മുന്‍ അറ്റാക്കിങ് മിഡ് ഫീല്‍ഡറായ പാബ്ലോ എയ്മര്‍ ഖത്തറിലേക്ക് എത്തിയത്. മെസിയുടെ ആരാധനാപാത്രവും മെന്ററുമാണ് എയ്മര്‍. ഇരുവരും അര്‍ജന്റീനയ്ക്കായി ഒരുമിച്ച് പന്ത് തട്ടാനും ഇറങ്ങിയിട്ടുണ്ട്. 

മെക്‌സിക്കോയ്ക്ക് എതിരെ മെസി ഗോള്‍വല കുലുക്കിയതിന് പിന്നാലെ സന്തോഷം കൊണ്ട് മുഖം പൊത്തി കരയുകയും വൈകാരികമായിരിക്കുകയും ചെയ്യുന്ന എയ്മറിന്റെ വീഡിയോയാണ് സമൂഹമാധ്യമങ്ങളില്‍ ഇപ്പോള്‍ വൈറലാവുന്നത്. കരയുന്ന എയ്മറിന്റെ അടുത്ത് ചെന്ന് പരിശീലകന്‍ സ്‌കലോനി സംസാരിക്കുന്നുണ്ട്. എന്നാല്‍ എന്താണ് എയ്മറിനോട് സ്‌കലോനി പറയുന്നതെന്ന് വ്യക്തമല്ല. 

52 മത്സരങ്ങളാണ് എയ്മര്‍ അര്‍ജന്റീനയ്ക്ക് വേണ്ട്ി കളിച്ചത്. 1999 മുതല്‍ 2009 വരെ ഇദ്ദേഹം ടീമിന്റെ ഭാഗമായിരുന്നു. നേടിയത് 8 ഗോളുകളും. നിലവില്‍ അര്‍ജന്റീനയുടെ അണ്ടര്‍ 17 ടീമിന്റെ പരിശീലകനുമാണ്.

ഈ വാര്‍ത്ത കൂടി വായിക്കൂ‌

ചുമലിലെ ഭാരം ഒഴിഞ്ഞിരിക്കുന്നു, ഞങ്ങളുടെ വിധി ഇനി ഞങ്ങളുടെ കൈകളില്‍: മെസി 

സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ