രക്ഷയായത് നിക്കോളാസ് പൂരന്റെ വെടിക്കെട്ട്; ബംഗ്ലാദേശിന് മുന്നില്‍ 143 റണ്‍സ് ലക്ഷ്യം വച്ച് വിന്‍ഡീസ്

ഷാര്‍ജ: ടി20 ലോകകപ്പ് സൂപ്പര്‍ 12ലെ നിര്‍ണായക പോരാട്ടത്തില്‍ ബംഗ്ലാദേശിന് മുന്നില്‍ 143 റണ്‍സ് വിജയ ലക്ഷ്യം വച്ച് നിലവിലെ ചാമ്പ്യന്‍മാരായ വെസ്റ്റ് ഇന്‍ഡീസ്. ആദ്യം ബാറ്റ് ചെയ്ത വിന്‍ഡീസ് നിശ്ചിത ഓവറില്‍ ഏഴ് വിക്കറ്റ് നഷ്ടത്തില്‍ 142 റണ്‍സാണ് കണ്ടെത്തിയത്. 

ടോസ് നേടി ബംഗ്ലാദേശ് ആദ്യം ബൗള്‍ ചെയ്യാന്‍ തീരുമാനിക്കുകയായിരുന്നു. വിന്‍ഡീസിന്റെ തുടക്കം തകര്‍ച്ചയോടെയായിരുന്നു. ക്രിസ് ഗെയ്ല്‍ (നാല്), എവിന്‍ ലൂയീസ് (ആറ്) എന്നിവര്‍ വേഗത്തില്‍ മടങ്ങി. 

വിന്‍ഡീസിനായി ടി20യില്‍ അരങ്ങേറിയ റോസ്റ്റന്‍ ചേസ് ഒരറ്റത്ത് നിന്നെങ്കിലും മറുഭാഗത്ത് വിക്കറ്റുകള്‍ കൊഴിഞ്ഞു. ഹെറ്റ്‌മെയര്‍ (ഒന്‍പത്), ആന്ദ്രെ റസ്സല്‍ (പൂജ്യം) എന്നിവരെല്ലാം ക്ഷണത്തില്‍ കീഴടങ്ങി. ഒരു ഘട്ടത്തില്‍ വീന്‍ഡീസ് നാലിന് 62 എന്ന നിലയിലായിരുന്നു. 

നിക്കോളാസ് പൂരന്റെ അവസരോചിത വെടിക്കെട്ടാണ് വിന്‍ഡീസ് സ്‌കോര്‍ ഈ നിലയില്‍ എത്തിച്ചത്. താരം 22 പന്തുകള്‍ നേരിട്ട് നാല് സിക്‌സുകളും ഒരു ഫോറും സഹിതം 40 റണ്‍സ് വാരി. പിന്നീട് അഞ്ച് പന്തില്‍ രണ്ട് സിക്‌സുകള്‍ സഹിതം 15 റണ്‍സെടുത്ത് ജാസന്‍ ഹോള്‍ഡറും ടീം സ്‌കോറിലേക്ക് നിര്‍ണായക സംഭാവന നല്‍കി. ക്യാപ്റ്റന്‍ കെയ്‌റോണ്‍ പൊള്ളാര്‍ഡ് 14 റണ്‍സുമായി ഹോള്‍ഡര്‍ക്കൊപ്പം പുറത്താകാതെ നിന്നു. 

ബംഗ്ലാദേശിനായി മെഹദി ഹസന്‍, മുസ്താഫിസുര്‍ റഹ്മാന്‍, ഷൊരിഫുള്‍ ഇസ്ലാം എന്നിവര്‍ രണ്ട് വീതം വിക്കറ്റുകള്‍ വീഴ്ത്തി. ആദ്യ രണ്ട് മത്സരങ്ങളും പരാജയപ്പെട്ടാണ് ബംഗ്ലാദേശും വിന്‍ഡീസും നേര്‍ക്കുനേര്‍ പോരാടുന്നത്.