മുംബൈയ്‌ക്കെതിരായ മത്സരത്തില്‍ ബംഗളൂരുവിന് മിന്നും ജയം സമ്മാനിച്ചതില്‍ പ്രധാനി ഹര്‍ഷല്‍ പട്ടേല്‍ തന്നെ. ഹാട്രിക്ക് നേട്ടം അടക്കം 4 വിക്കറ്റുകള്‍ നേടിയ ഹര്‍ഷല്‍ പട്ടേലാണ് മുംബൈയുടെ മൊനയൊടിച്ചത്. 3.1 ഓവറില്‍ 17 റണ്‍സ് മാത്രം വഴങ്ങിയാണ് ഹര്‍ഷല്‍ 4 വിക്കറ്റുകള്‍ പിഴുതത്. 23 വിക്കറ്റുകളുമായി പര്‍പ്പിള്‍ ക്യാപ്പ് കൈയടക്കിയിട്ടുമുണ്ട് ഹര്‍ഷല്‍. ജീവിതത്തില്‍ ആദ്യമായി നേടുന്ന ഹാട്രിക്ക് ആയതുകൊണ്ടുതന്നെ ഇത് സ്‌പെഷ്യലാണെന്ന് പറയുകയാണ് ഹര്‍ഷല്‍. 

' എന്റെ ജീവിതത്തില്‍ ആദ്യമായാണ് ഞാനൊരു ഹാട്രിക്ക് സ്വന്തമാക്കുന്നത്. സ്‌കൂള്‍ ഗെയിമുകളില്‍ പോലും ഇത് സംഭവിച്ചിട്ടില്ല. ഐപിഎല്ലില്‍ തന്നെ മുമ്പ് ആറ് തവണ ഹാട്രിക്കിന് അടുത്തെത്തിയതാണ്, പക്ഷെ ആദ്യമായാണ് ഇത് എന്നിലേക്കെത്തുന്നത്. ഈ നേട്ടം മങ്ങാന്‍ കുറച്ച് സമയമെടുക്കും', മത്സരശേഷം ഹര്‍ഷല്‍ പറഞ്ഞു. 

മത്സരത്തിന്റെ 17-ാം ഓവറില്‍ ഹാര്‍ദിക് പാണ്ഡ്യ (6 പന്തില്‍ 3), കീറണ്‍ പൊള്ളാര്‍ഡ് (10 പന്തില്‍ 7), രാഹുല്‍ ചാഹര്‍ (1 പന്തില്‍ 0 ) എന്നിവരെ പുറത്താക്കിയാണ് ഹര്‍ഷല്‍ സ്വപ്‌നനേട്ടത്തിലെത്തിയത്. ഇതില്‍ തന്നെ പൊള്ളാര്‍ഡിന്റെ വിക്കറ്റാണ് ഏറ്റവും സന്തോഷം നല്‍കിയതെന്നും ഹര്‍ഷന്‍ പറഞ്ഞു.