സണ്‍റൈസേഴ്‌സിനോട് വിടപറയുന്നു, സ്ഥിരീകരിച്ച് ഡേവിഡ് വാര്‍ണര്‍

സണ്‍റൈസേഴ്‌സ് ഹൈദരാബാദിനോട് വിടപറയുന്നതായി സ്ഥിരീകരിച്ച് ഡേവിഡ് വാര്‍ണര്‍. ഇന്‍സ്റ്റഗ്രാം പോസ്റ്റിലൂടെയാണ് വാര്‍ണര്‍ ഇക്കാര്യം സ്ഥിരീകരിക്കുന്നത്. 

ഐപിഎല്‍ പതിനാലാം സീസണ്‍ യുഎഇയില്‍ പുനരാരംഭിച്ചതിന് പിന്നാലെ വാര്‍ണര്‍ ഹൈദരാബാദ് ടീം വിട്ടേക്കുമെന്ന് ഉറപ്പായിരുന്നു. എന്നാല്‍ ഇക്കാര്യത്തില്‍ ഇപ്പോഴാണ് വാര്‍ണറുടെ ഔദ്യോഗിക പ്രതികരണം വരുന്നത്. 

ഐപിഎല്‍ കിരീടം ഉയര്‍ത്തി നില്‍ക്കുന്നത് ഉള്‍പ്പെടെയുള്ള ഫോട്ടോകള്‍ പങ്കുവെച്ചാണ് സണ്‍റൈസേഴ്‌സിലെ യാത്ര വാര്‍ണര്‍ ഓര്‍മിക്കുന്നത്. 2014ല്‍ ഡല്‍ഹി ക്യാപിറ്റല്‍സ് റിലീസ് ചെയ്തതോടെയാണ് വാര്‍ണര്‍ ഹൈദരാബാദിനൊപ്പം ചേരുന്നത്. 

5.5 കോടി രൂപയ്ക്കാണ് വാര്‍ണര്‍ ഹൈദരാബാദില്‍ എത്തിയത്. 2015ല്‍ ഹൈദരാബാദിന്റെ നായക സ്ഥാനം ഏറ്റെടുത്ത വാര്‍ണര്‍ 2016ല്‍ ടീമിനെ കിരീടത്തിലേക്ക് എത്തിച്ചു. വാര്‍ണര്‍ക്ക് കീഴില്‍ സ്ഥിരത കണ്ടെത്തിയ ഹൈദരാബാദ് 2017ലും പ്ലേഓഫില്‍ കടന്നിരുന്നു.