'18 വര്‍ഷം നീണ്ട ബന്ധം അവസാനിച്ചു'; ചെന്നൈ സൂപ്പര്‍ കിങ്‌സിന്റെ മുഖ്യ പരിശീലക സ്ഥാനം ഒഴിഞ്ഞ് സ്റ്റീഫന്‍ ഫ്‌ലെമിങ്
തുടര്‍ച്ചയായ മൂന്ന് സീസണുകളില്‍ കിരീടം നേടാന്‍ കഴിയാതെ പോയതോടെയാണ് ഫ്‌ലെമിങ്ങിന്റെ ഭാവിയെക്കുറിച്ചുള്ള ചര്‍ച്ചകള്‍ സജീവമായത്.
സ്റ്റീഫന്‍ ഫ്‌ലെമിങ്,എംഎസ് ധോനി
PTI
Edited by :Amal Joy
Last Updated :13 ജൂലൈ 2026, 1:07 pm IST
ചെന്നൈ: ചെന്നൈ സൂപ്പര്‍ കിങ്‌സിന്റെ മുഖ്യ പരിശീലക സ്ഥാനത്തുനിന്ന് സ്റ്റീഫന്‍ ഫ്‌ലെമിങ് ഒഴിഞ്ഞു. ഫ്‌ലെമിങ്ങിന്റെ പരിശീലനത്തിന് കീഴില്‍ അഞ്ച് ഐപിഎല്‍ കിരീടങ്ങളും രണ്ട് ചാംപ്യന്‍സ് ലീഗ് ടി20 കിരീടങ്ങളും ചെന്നൈ സൂപ്പര്‍ കിങ്‌സ് സ്വന്തമാക്കിയിട്ടുണ്ട്. 18 വര്‍ഷം നീണ്ടുനിന്ന അഭേദ്യമായ ബന്ധത്തിന് ശേഷമാണ് ഫ്‌ലെമിങ് ചെന്നൈ ടീമിനോട് വിടപറയുന്നത്.
ധാരണ പ്രകാരമാണ് ഫ്‌ലെമിങ്ങും ചെന്നൈ ഫ്രാഞ്ചൈസിയും വേര്‍പിരിയുന്നതെന്ന് സിഎസ്‌കെ മാനേജ്മെന്റ് അറിയിച്ചു. ഐപിഎല്‍ ചരിത്രത്തിലെ ഏറ്റവും വിജയകരവും മാതൃകാപരവുമായ ഒരു കൂട്ടുകെട്ടാണ് ഇതിലൂടെ അവസാനിക്കുന്നത്. ആദരവോടും കൃതജ്ഞതയോടും കൂടിയാണ് ഈ തീരുമാനത്തിലേക്ക് എത്തിയതെന്നും മാനേജ്മെന്റ് വ്യക്തമാക്കി.
തുടര്‍ച്ചയായ മൂന്ന് സീസണുകളില്‍ കിരീടം നേടാന്‍ കഴിയാതെ പോയതോടെയാണ് ഫ്‌ലെമിങ്ങിന്റെ ഭാവിയെക്കുറിച്ചുള്ള ചര്‍ച്ചകള്‍ സജീവമായത്. 2025 ലെ ഐപിഎല്ലില്‍ അവസാന സ്ഥാനത്തായിരുന്ന സിഎസ്‌കെ, 2026 സീസണില്‍ എട്ടാം സ്ഥാനത്താണ് ഫിനിഷ് ചെയ്തത്. മേജര്‍ ലീഗ് ക്രിക്കറ്റില്‍ ഫ്‌ലെമിങ് പരിശീലിപ്പിച്ച ടെക്‌സസ് സൂപ്പര്‍ കിങ്‌സ് അവസാന സ്ഥാനത്തായതിന് തൊട്ടുപിന്നാലെയാണ് സിഎസ്‌കെയിലെ ഈ അഴിച്ചുപണി. എന്നാല്‍ ജാബര്‍ഗ് സൂപ്പര്‍ കിങ്‌സ്, ടെക്‌സസ് സൂപ്പര്‍ കിങ്‌സ് എന്നീ ഫ്രാഞ്ചൈസികളുടെ പരിശീലക സ്ഥാനത്ത് അദ്ദേഹം തുടരുമോ എന്ന കാര്യം സിഎസ്‌കെ വ്യക്തമാക്കിയിട്ടില്ല.
'കായികരംഗത്ത് 18 വര്‍ഷം എന്നത് വലിയൊരു കാലയളവാണ്. നിറഞ്ഞ നന്ദിയോടെയാണ് ഞാന്‍ പടിയിറങ്ങുന്നത്,' ഫ്‌ലെമിങ് വികാരഭരിതനായി പറഞ്ഞു. സിഎസ്‌കെയെ പരിശീലിപ്പിക്കാന്‍ കഴിഞ്ഞത് തന്റെ കരിയറിലെ ഏറ്റവും വലിയ ഭാഗ്യമാണെന്നും ടീമിന്റെ നേട്ടങ്ങളില്‍ അഭിമാനിക്കുന്നുവെന്നും അദ്ദേഹം കൂട്ടിച്ചേര്‍ത്തു. 2010, 2011, 2018, 2021, 2023 വര്‍ഷങ്ങളിലെ സിഎസ്‌കെയുടെ ഐപിഎല്‍ കിരീട നേട്ടങ്ങള്‍ക്ക് പിന്നില്‍ ഫ്‌ലെമിങ് എന്ന മാസ്റ്റര്‍ ബ്രെയിന്‍ ഉണ്ടായിരുന്നു. എംഎസ് ധോനിയുമായി ചേര്‍ന്നുള്ള ഫ്‌ലെമിങ്ങിന്റെ തന്ത്രങ്ങളാണ് സിഎസ്‌കെയെ റെക്കോര്‍ഡ് വേഗതയില്‍ 12 തവണ പ്ലേഓഫിലും 10 തവണ ഫൈനലിലുമെത്തിച്ചത്.
News Now
'ഇത്തിരി പോന്ന എന്റെ പിറകെ ആട്ടിന്‍ കുട്ടിയെപ്പോലെ അവന്‍ നടന്നു; ആ വീട്ടുകാര്‍ എങ്ങനെ സഹിക്കും'; പല്ലാട്ട് ബ്രഹ്മദത്തനെ ഓര്‍ത്ത് മീനാക്ഷി
'എന്നെ ഓര്‍മ്മിക്കാനായി... നന്ദിയോടെ'; അധ്യാപക ദിനത്തില്‍ 55 വര്‍ഷം പഴക്കമുള്ള ചിത്രം പങ്കിട്ട് യുഎഇ പ്രസിഡന്റ്
ലൈഫ് പദ്ധതി തുടരും; ലക്ഷ്യം ഭവനരഹിതരില്ലാത്ത കേരളമെന്ന് മുഖ്യമന്ത്രി
ഇത് ലൈംഗികാതിക്രമത്തിന് തുല്യം, മനുഷ്യനായി പരിഗണിക്കമെന്ന് ആവശ്യപ്പെടുന്നത് കൂടുതലാണോ?: ജാന്‍വി കപൂര്‍
Summary
Stephen Fleming steps down as CSK head coach after 18 years at helm
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
