ക്ലച്ച് ഇല്ലാതെ അനായാസം ഗിയര്‍ മാറാം, ക്വിക്ക് ഷിഫ്റ്റർ ഫീച്ചര്‍; യമഹ ആര്‍15 വി4ന് പുതിയ രണ്ടു വേരിയന്റുകള്‍

മുംബൈ: പ്രമുഖ ഇരുചക്ര വാഹന നിര്‍മ്മാതാക്കളായ യമഹ, തങ്ങളുടെ ആര്‍15 വി4ന്റെ പുതിയ രണ്ട് വേരിയന്റുകള്‍ പുറത്തിറക്കി. ക്ലച്ച് ഇല്ലാതെ തന്നെ മാനുവല്‍ മോട്ടോര്‍സൈക്കളിലില്‍ ഗിയര്‍ മാറ്റാന്‍ സഹായിക്കുന്ന ഇലക്ട്രോണിക് ഉപകരണമായ ക്വിക്ക് ഷിഫ്റ്റർ ആണ് ഈ രണ്ട് പുതിയ വേരിയന്റുകളെ വ്യത്യസ്തമാക്കുന്നത്. ഇതുവരെ ഇന്റന്‍സിറ്റി വൈറ്റ് വേര്‍ഷനില്‍ മാത്രമായിരുന്നു ക്വിക്ക് ഷിഫ്റ്റർ. എന്നാല്‍ ഇപ്പോള്‍ റേസിങ് ബ്ല്യൂ, മാറ്റ് പേള്‍ വൈറ്റ് പതിപ്പുകളിലും ഈ ഫീച്ചര്‍ ലഭിക്കും.

ക്വിക്ക് ഷിഫ്റ്ററോട് കൂടി ആര്‍15 വി4 വേരിയന്റിന് 1,79,500 രൂപയാണ് (എക്‌സ്‌ഷോറൂം) വില. ക്വിക്ക് ഷിഫ്റ്റര്‍ ഇല്ലാത്ത വേരിയന്റിനേക്കാള്‍ 4650 രൂപ കൂടുതലാണ് ഈ പുതിയ വേരിയന്റിന്. 18.1 ബിഎച്ച്പി കരുത്തും 14.2 എന്‍എം ടോര്‍ക്കും ഉല്‍പ്പാദിപ്പിക്കുന്ന 155സിസി, സിംഗിള്‍ സിലിണ്ടര്‍ എന്‍ജിനാണ് ഇതിലുള്ളത്.

ആറ് സ്പീഡ് ഗിയര്‍ബോക്‌സുമായാണ് എന്‍ജിന്‍ ബന്ധിച്ചിരിക്കുന്നത്. നിലവില്‍ ടോപ്പ് സ്‌പെസിഫിക്കേഷന്‍ മോഡലായ ആര്‍15 എം വേരിയന്റില്‍ ക്വിക്ക് ഷിഫ്റ്റര്‍ ഫീച്ചര്‍ ഉണ്ട്.