എല്ലാ ദിവസവും നൂറ് രൂപ വീതം നീക്കിവെയ്ക്കാമോ?, 15 വര്‍ഷം കൊണ്ട് ലക്ഷങ്ങള്‍ സമ്പാദിക്കാം; ചെയ്യേണ്ടത് ഇത്രമാത്രം

പശ്ചിമേഷ്യന്‍ സംഘര്‍ഷത്തിന് അയവ് വന്നിരിക്കുകയാണ്. വിപണി വീണ്ടും ശക്തമായി തിരിച്ചുവരുമെന്ന പ്രതീക്ഷയിലാണ് ഒരു വിഭാഗം നിക്ഷേപകര്‍. വീണ്ടും അമേരിക്ക- ഇറാന്‍ സംഘര്‍ഷം ഉണ്ടാവുമോ എന്നും സമ്പദ് വ്യവസ്ഥ ദുര്‍ബലമാകുമോ എന്നുമുള്ള ആശങ്ക മറുവിഭാഗം പങ്കുവെയ്ക്കുന്നുണ്ട്. നിലവിലെ സാഹചര്യത്തില്‍ ദീര്‍ഘകാലം ലക്ഷ്യമിട്ട് എസ്ഐപി വഴി മ്യൂച്ചല്‍ ഫണ്ടില്‍ നിക്ഷേപിക്കുന്നതില്‍ തെറ്റില്ലെന്നാണ് ഒരു വിഭാഗം വിപണി വിദഗ്ധര്‍ പറയുന്നത്.

നിക്ഷേപകരെ വ്യത്യസ്ത സമയങ്ങളില്‍ നിക്ഷേപിക്കാന്‍ അനുവദിക്കുന്നതിനാല്‍ വിപണിയിലെ ചാഞ്ചാട്ടം കൈകാര്യം ചെയ്യുന്നതില്‍ എസ്ഐപികള്‍ മുന്നിട്ടുനില്‍ക്കുന്നുവെന്നാണ് വിദഗ്ധരുടെ വിശദീകരണം. അതുവഴി റിസ്‌ക് വൈവിധ്യവല്‍ക്കരണത്തിനുള്ള സാധ്യതയും നിലനില്‍ക്കുന്നുണ്ട്. അസ്ഥിരത നിലനില്‍ക്കുന്ന സമയങ്ങളില്‍ നിക്ഷേപകര്‍ അവരുടെ എസ്ഐപി തുക ഉയര്‍ത്തുന്നതും ഭാവിയില്‍ ഗുണം ചെയ്യുമെന്നും ഒരു വിഭാഗം വിപണി വിദഗ്ധര്‍ വാദിക്കുന്നുണ്ട്. കയറ്റിറക്കങ്ങളില്‍ ആവറേജ് ചെയ്യുന്നത് കൊണ്ട് വലിയ റിസ്‌ക് വരുന്നില്ലെന്നാണ് വിദഗ്ധര്‍ പറയുന്നത്. അച്ചടക്കം പാലിക്കാനും വിപണിയിലെ ഉയര്‍ച്ച താഴ്ചകളില്‍ ആവേശകരമായ എക്സിറ്റുകള്‍ തടയാനും എസ്ഐപികള്‍ സഹായിക്കുന്നുണ്ട്. എസ്‌ഐപി നിക്ഷേപം ഗ്യാരണ്ടീഡ് റിട്ടേണ്‍ സ്‌കീം അല്ല. നഷ്ടസാധ്യത ഉള്ള കാര്യവും നിക്ഷേപകര്‍ ഓര്‍ക്കണമെന്നും വിപണി വിദഗ്ധര്‍ പറഞ്ഞു. വിപണിയുടെ ഏറ്റക്കുറച്ചിലുകളും എസ്‌ഐപി നിക്ഷേപത്തെ സ്വാധീനിക്കും.

ഉദാഹരണമായി പ്രതിദിനം നൂറ് രൂപ വീതം (അതായത് മാസം 3000 രൂപ) എസ്ഐപിയില്‍ നിക്ഷേപിക്കുകയാണെങ്കില്‍ 15 വര്‍ഷം കൊണ്ട് 5,40,000 രൂപയാണ് നിക്ഷേപമായി വരിക. ഇതില്‍ നിന്നുള്ള പലിശവരുമാനം (മൂലധന നേട്ടം) 8,87,794 രൂപയായിരിക്കും. അതായത് 15 വര്‍ഷം കൊണ്ട് അടച്ച തുകയും മൂലധന നേട്ടവും കൂടി ചേരുമ്പോള്‍ ഏകദേശം 14,27,794 രൂപയാണ് കൈയില്‍ കിട്ടുക. വര്‍ഷംതോറും ശരാശരി 12 ശതമാനം റിട്ടേണ്‍ ലഭിക്കുമെന്ന പ്രതീക്ഷയിലാണ് ഈ കണക്ക്. മ്യൂച്ചല്‍ ഫണ്ട് നിക്ഷേപത്തിലും റിസ്‌ക് ഉള്ളതിനാല്‍ ചിലപ്പോള്‍ കിട്ടുന്ന തുകയില്‍ മാറ്റം വരാം. എന്നാല്‍ ദീര്‍ഘകാലം ലക്ഷ്യമിട്ട് നിക്ഷേപം നടത്തുകയാണെങ്കില്‍ ആശങ്കപ്പെടേണ്ടതില്ലെന്നാണ് വിദഗ്ധര്‍ പറയുന്നത്.