എണ്ണവില 80 ഡോളറില്‍ താഴെ; ഓഹരി വിപണിയില്‍ നാലാം ദിവസവും റാലി, രൂപയ്ക്കും നേട്ടം

മുംബൈ: തുടര്‍ച്ചയായ നാലാം ദിവസവും ഓഹരി വിപണിയില്‍ മുന്നേറ്റം. ബിഎസ്ഇ സെന്‍സെക്‌സ് 347 പോയിന്റ് നേട്ടത്തോടെ 77,000ന് മുകളില്‍ ക്ലോസ് ചെയ്തു. നിഫ്റ്റി 24000 എന്ന സൈക്കോളജിക്കല്‍ ലെവലിനും മുകളില്‍ എത്തി.

അമേരിക്ക- ഇറാന്‍ സമാധാന കരാറിനെ തുടര്‍ന്ന് ആഗോള വിപണിയില്‍ എണ്ണവില കുത്തനെ താഴ്ന്നത് അടക്കമുള്ള വിഷയങ്ങളാണ് വിപണിയില്‍ പ്രതിഫലിച്ചത്. ഇന്ത്യ മുഖ്യമായി ആശ്രയിക്കുന്ന ബ്രെന്‍ഡ് ക്രൂഡിന്റെ വില ബാരലിന് 80 ഡോളറില്‍ താഴെയെത്തി. കുറച്ചുനാളുകള്‍ക്ക് ശേഷം ആദ്യമായാണ് എണ്ണവില 80 ഡോളറില്‍ താഴെ എത്തുന്നത്. ട്രെന്‍ഡ്, ഭാരത് ഇലക്ട്രോണിക്‌സ്, ടാറ്റ സ്റ്റീല്‍, ഇന്‍ഫോസിസ്, ടൈറ്റന്‍, ഭാരതി എയര്‍ടെല്‍ എന്നിവരാണ് പ്രധാനമായി നേട്ടം ഉണ്ടാക്കിയത്.

അതിനിടെ ഡോളറിനെതിരെ രൂപയുടെ മൂല്യവും ഉയര്‍ന്നു. 10 പൈസയുടെ നേട്ടത്തോടെ 94.50ലാണ് രൂപ ക്ലോസ് ചെയ്തത്. ആഗോള വിപണിയില്‍ എണ്ണവില ഗണ്യമായി കുറഞ്ഞതോടെ ഇന്ത്യയുടെ ഇറക്കുമതി ചെലവ് കുറയും എന്നതടക്കമുള്ള അനുകൂല ഘടകങ്ങളാണ് രൂപയില്‍ പ്രതിഫലിച്ചത്.