തിരുവനന്തപുരം: ബിജെപി സ്ഥാനാർഥി കുമ്മനം രാജശേഖരൻ നടൻ മോഹൻലാലുമായി കൂടിക്കാഴ്ച നടത്തി. മോഹൻലാലിന് പത്മഭൂഷൻ അവാർഡ് കിട്ടിയതിൽ അഭിനന്ദിക്കാൻ എത്തിയതായിരുന്നു അദ്ദേഹം. വരുന്ന ലോക്സഭാ തെരഞ്ഞെടുപ്പിൽ തിരുവനന്തപുരത്ത് മത്സരിക്കുന്ന കുമ്മനം സ്വകാര്യ ഹോട്ടലിലെത്തിയാണ് മോഹൻലാലിനെ സന്ദർശിച്ചത്. 

മോഹൻലാലിനെ സന്ദർശിച്ച വിവരം തന്റെ ഔദ്യോ​ഗിക ഫെയ്സ്ബുക്ക് പോസ്റ്റിലൂടെയാണ് കുമ്മനം വ്യക്തമാക്കിയത്. തെരഞ്ഞെടുപ്പ് പ്രവർത്തനങ്ങൾക്ക് മോഹൻലാൽ ആശംസകൾ നേർന്നതായും കുമ്മനം കുറിച്ചു. 

നേരത്തെ തിരുവനന്തപുരത്ത് ബിജെപി സ്ഥാനാർത്ഥിയായി മോഹൻലാലിനെ മത്സരിപ്പിക്കാന്‍ നീക്കം നടക്കുന്നതായി റിപ്പോർട്ടുകൾ വന്നിരുന്നു. എന്നാൽ രാഷ്ട്രീയത്തിലേക്കില്ലെന്ന് മോഹൻലാൽ നിലപാട് വ്യക്തമാക്കിയതോടെ അഭ്യൂഹ​ങ്ങൾ അവസാനിക്കുകയായിരുന്നു. യുഡിഎഫ് സ്ഥാനാർത്ഥി ശശി തരൂർ, എൽഡിഎഫ് സ്ഥാനാർത്ഥി സി ദിവാകരൻ എന്നിവരുമായാണ് തിരുവനന്തപുരത്ത് കുമ്മനം ഏറ്റുമുട്ടുന്നത്.