11,000mAh ബാറ്ററി, ബയോമെട്രിക് ഓതന്റിക്കേഷന്‍ ഫീച്ചറുകള്‍; ഹോണര്‍ X80 പ്രോ മാക്‌സ് ഉടന്‍ വിപണിയില്‍

പ്രമുഖ സ്മാര്‍ട്ട്‌ഫോണ്‍ നിര്‍മ്മാതാക്കളായ ഹോണര്‍ അവരുടെ X80 ലൈനപ്പ് വിപുലീകരിച്ച് 'പ്രോ മാക്‌സ്' എന്ന പേരില്‍ പുതിയ ഫോണ്‍ വിപണിയില്‍ അവതരിപ്പിക്കാന്‍ ഒരുങ്ങുന്നതായി റിപ്പോര്‍ട്ട്. അതേസമയം, അടിസ്ഥാന മോഡലായ ഹോണര്‍ X80 ഈ മാസം അവസാനം ചൈനയില്‍ ലോഞ്ച് ചെയ്‌തേക്കുമെന്നാണ് റിപ്പോര്‍ട്ടുകള്‍.

വിവരങ്ങള്‍ പ്രകാരം, ഈ ഹാന്‍ഡ്‌സെറ്റില്‍ 90W ഫാസ്റ്റ് ചാര്‍ജിങ് പിന്തുണയുള്ള 11,000mAh കൂറ്റന്‍ ബാറ്ററി ഉണ്ടായിരിക്കും. മെലിഞ്ഞ ബെസലുകളും വളഞ്ഞ കോണുകളുമുള്ള 6.8 ഇഞ്ച് ഫ്‌ലാറ്റ് അമോലെഡ് ഡിസ്‌പ്ലേയാണ് ഇതിലുണ്ടാകുക. ഇത് 2788 × 1280 പിക്‌സല്‍ റെസല്യൂഷനോട് കൂടിയായിരിക്കും വിപണിയില്‍ എത്തുക എന്നാണ് പറയപ്പെടുന്നത്.

സ്‌നാപ്ഡ്രാഗണ്‍ 6 ജെന്‍ 5 ചിപ്‌സെറ്റാണ് ഹോണര്‍ X80 പ്രോ മാക്‌സിന് കരുത്ത് പകരുന്നത്. ഇതിനൊപ്പം പൂര്‍ണ്ണമായ വാട്ടര്‍ റെസിസ്റ്റന്‍സ് (വെള്ളത്തെ പ്രതിരോധിക്കാനുള്ള ശേഷി), തറയില്‍ വീണാലും കേടുപാടുകള്‍ സംഭവിക്കാത്ത ഡിസൈന്‍ (drop-resistant design), ഫ്‌ലാഗ്ഷിപ്പ് ലെവല്‍ ബയോമെട്രിക് ഓതന്റിക്കേഷന്‍ ഫീച്ചറുകള്‍ എന്നിവയും ഈ ഫോണില്‍ ഉണ്ടായേക്കും.

സാധാരണ ഹോണര്‍ X80 മോഡലിലും സ്‌നാപ്ഡ്രാഗണ്‍ 6 ജെന്‍ 5 പ്രൊസസ്സര്‍ തന്നെയായിരിക്കും ഉപയോഗിക്കുക. ഇതില്‍ 6.8 ഇഞ്ച് അമോലെഡ് ഡിസ്‌പ്ലേയും 10,000mAh ബാറ്ററിയും ഉണ്ടായിരിക്കുമെന്നും റിപ്പോര്‍ട്ടുകള്‍ സൂചിപ്പിക്കുന്നു.