വീട് വൃത്തിയാകാനും മനസ്സ് ശാന്തമാകാനും പതിവ് ശുചീകരണം മാത്രം പോരാ, ഉപയോ​ഗമില്ലാത്ത വസ്തുക്കൾ അനാവശ്യമായി സൂക്ഷിക്കുന്ന ശീലവും മാറ്റേണ്ടതുണ്ട്. പിന്നീട് ഉപയോ​ഗിക്കാമെന്ന ചിന്തയിൽ പലരും പഴയ വസ്ത്രങ്ങൾ മുതൽ കാലാവധി കഴിഞ്ഞ ഉൽപന്നങ്ങൾ വരെ വീടിന്റെ പല ഭാഗങ്ങളിലായി സൂക്ഷിക്കാറുണ്ട്. ഇവ വീട്ടിൽ കൂടുതൽ ഇടം കൈയടക്കുന്നതിനൊപ്പം പൊടിയും അഴുക്കും അടിഞ്ഞുകൂടുന്നതിനും കാരണമാകാം.

ആരോ​ഗ്യ വാർത്തകൾ കൂടുതൽ അറിയാൻ വാട്സ്ആപ്പ് ഗ്രൂപ്പിൽ അംഗമാകൂ.

ഇവിടെ ക്ലിക്ക്  ചെയ്യുക

വീട്ടിൽ അനാവശ്യമായി സൂക്ഷിക്കുന്നത് ഒഴിവാക്കേണ്ട 7 കാര്യങ്ങൾ ഏതൊക്കെയെന്ന് നോക്കാം

ഉപയോഗിക്കാത്ത പഴയ വസ്ത്രങ്ങൾ

വർഷങ്ങളായി ഉപയോഗിക്കാത്ത വസ്ത്രങ്ങൾ അലമാരയിൽ സൂക്ഷിക്കുന്ന ശീലം പലർക്കുമുണ്ട്. ശരീരത്തിന് പാകമാകാത്തതോ നിറം മങ്ങിയതോ കേടുപാടുകൾ സംഭവിച്ചതോ ആയ വസ്ത്രങ്ങൾ ഇത്തരത്തിൽ അലമാരയിൽ സ്ഥലം പിടിച്ചേക്കാം.

വസ്ത്രങ്ങൾ സൂക്ഷിക്കുന്നതിന് മുമ്പ് കഴിഞ്ഞ ഒരു വർഷത്തിനിടെ അവ ഉപയോഗിച്ചിട്ടുണ്ടോ എന്ന് ചിന്തിക്കുക. ഉപയോഗിക്കാൻ കഴിയുന്ന നല്ല വസ്ത്രങ്ങൾ ആവശ്യക്കാർക്ക് നൽകാം. കീറിയതും അറ്റകുറ്റപ്പണി നടത്തി ഉപയോഗിക്കാൻ കഴിയാത്തതുമായവ അനുയോജ്യമായ രീതിയിൽ പുനരുപയോഗത്തിനോ സംസ്കരണത്തിനോ കൈമാറാം.ഇത് അലമാരയിൽ തിരക്ക് കുറയ്ക്കാൻ സഹായിക്കും.

കാലാവധി കഴിഞ്ഞ ഭക്ഷണസാധനങ്ങളും ഉൽപന്നങ്ങളും

അടുക്കളയിലെ ഷെൽഫുകളിലും ഫ്രിഡ്ജിലും കാലാവധി കഴിഞ്ഞ ഭക്ഷണസാധനങ്ങൾ ഉണ്ടോ എന്ന് ഇടയ്ക്കിടെ പരിശോധിക്കണം. പഴയ മസാലപ്പൊടികൾ, തുറന്നുവെച്ച സോസുകൾ, കാലാവധി കഴിഞ്ഞ പാക്കറ്റ് ഭക്ഷണങ്ങൾ എന്നിവ ശ്രദ്ധിക്കേണ്ടവയാണ്. ഭക്ഷണസാധനങ്ങൾ വാങ്ങുമ്പോൾ ആവശ്യത്തിന് മാത്രം വാങ്ങുന്നതും പഴയവ ആദ്യം ഉപയോഗിക്കുന്ന രീതിയിൽ ക്രമീകരിക്കുന്നതും ഭക്ഷണം പാഴാകുന്നത് കുറയ്ക്കും.

പൊട്ടിയതും ഉപയോഗശൂന്യവുമായ പാത്രങ്ങൾ

പൊട്ടിയ കപ്പുകൾ, വിള്ളലുള്ള പ്ലേറ്റുകൾ, ഉപയോഗിക്കാനാകാത്ത പ്ലാസ്റ്റിക് പാത്രങ്ങൾ എന്നിവ പല വീടുകളിലും കാണാം. പിന്നീട് എന്തെങ്കിലും ആവശ്യത്തിന് ഉപയോഗിക്കാമെന്ന ചിന്തയിലാണ് ഇവ സൂക്ഷിക്കുന്നത്. എന്നാൽ മൂർച്ചയുള്ള അരികുകളുള്ള പൊട്ടിയ പാത്രങ്ങൾ കൈയ്ക്ക് പരിക്കേൽക്കാൻ കാരണമാകാം. ഭക്ഷണം സൂക്ഷിക്കാൻ ഉപയോഗിക്കുന്ന പാത്രങ്ങളിൽ വിള്ളലുകളോ കേടുപാടുകളോ ഉണ്ടെങ്കിൽ അവ മാറ്റുന്നതാണ് നല്ലത്.

പഴയ ബില്ലുകളും അനാവശ്യ പേപ്പറുകളും

പഴയ ഷോപ്പിങ് ബില്ലുകൾ, ഉപയോഗശൂന്യമായ കവറുകൾ, പരസ്യലഘുലേഖകൾ, ആവശ്യമില്ലാത്ത കുറിപ്പുകൾ എന്നിവ മേശകളിലും ഡ്രോയറുകളിലും അടിഞ്ഞുകൂടാറുണ്ട്. ഇവ ആവശ്യമായ രേഖകൾ കണ്ടെത്തുന്നത് ബുദ്ധിമുട്ടാക്കും. എന്നാൽ എല്ലാ പേപ്പറുകളും ഉടൻ കളയരുത്. നികുതി, ബാങ്കിങ്, ഇൻഷുറൻസ്, വാറന്റി, സ്വത്ത്, നിയമപരമായ ആവശ്യങ്ങൾ എന്നിവയുമായി ബന്ധപ്പെട്ട രേഖകൾ ആവശ്യമായ കാലയളവിൽ സുരക്ഷിതമായി സൂക്ഷിക്കണം. ആവശ്യമില്ലാത്ത പേപ്പറുകൾ വേർതിരിച്ച് റീസൈക്ലിങ്ങിന് നൽകാം.

ഉപയോഗിക്കാത്ത ഇലക്ട്രോണിക് ഉപകരണങ്ങളും ചാർജറുകളും

പഴയ മൊബൈൽ ഫോണുകൾ, പ്രവർത്തിക്കാത്ത ചാർജറുകൾ, കേടായ ഹെഡ്ഫോണുകൾ, ഉപയോഗിക്കാത്ത കേബിളുകൾ എന്നിവ വീട്ടിൽ അനാവശ്യമായി സ്ഥലം പിടിക്കുന്നവയാണ്. ഏത് ഉപകരണത്തിന്റേതാണ് ഓരോ ചാർജറെന്നും തിരിച്ചറിയാൻ കഴിയാത്ത സാഹചര്യവും ഉണ്ടാകാം. പ്രവർത്തിക്കുന്നതും ആവശ്യമായതുമായ ഉപകരണങ്ങൾ മാത്രം ക്രമമായി സൂക്ഷിക്കുക.

ഉപയോഗിക്കാത്ത പ്ലാസ്റ്റിക് കവറുകളും പാക്കിങ് ബോക്സുകളും

കടയിൽ നിന്ന് ലഭിക്കുന്ന പ്ലാസ്റ്റിക് കവറുകൾ, ഓൺലൈൻ ഷോപ്പിങ്ങിന്റെ കാർഡ്ബോർഡ് പെട്ടികൾ, സമ്മാനപ്പൊതികൾ എന്നിവ പിന്നീട് ഉപയോഗിക്കാമെന്ന് കരുതി സൂക്ഷിക്കുന്നത് സാധാരണമാണ്. എന്നാൽ ആവശ്യത്തിലധികം ഇവ ശേഖരിക്കുന്നത് സ്റ്റോറേജ് ഇടം കുറയ്ക്കും.

ഉപയോഗിക്കാത്ത അലങ്കാരവസ്തുക്കളും പഴയ സമ്മാനങ്ങളും

ഓർമ്മകളുമായി ബന്ധപ്പെട്ട സമ്മാനങ്ങൾ, പഴയ ഷോപീസുകൾ, ഉപയോഗിക്കാത്ത അലങ്കാരവസ്തുക്കൾ എന്നിവ ഉപേക്ഷിക്കാൻ പലർക്കും മടിയുണ്ടാകും. എന്നാൽ എല്ലാ വസ്തുക്കളും സൂക്ഷിക്കേണ്ടതില്ല. ഒരു വസ്തു നിങ്ങൾക്ക് സന്തോഷം നൽകുന്നുണ്ടോ, വീട്ടിൽ ഉപയോഗിക്കുന്നുണ്ടോ, അതിന് യഥാർഥത്തിൽ പ്രാധാന്യമുണ്ടോ എന്ന് ചിന്തിക്കുക. പ്രിയപ്പെട്ട ഓർമ്മകളുമായി ബന്ധപ്പെട്ട ഒന്നോ രണ്ടോ വസ്തുക്കൾ മനോഹരമായി സൂക്ഷിക്കാം. ഉപയോഗമില്ലാത്തതും നല്ല നിലയിലുള്ളതുമായവ മറ്റുള്ളവർക്ക് നൽകാം.

വീട് ക്രമപ്പെടുത്താൻ ചില സിംപിൾ ശീലങ്ങൾ

• ദിവസവും 10 മിനിറ്റ് മാറ്റിവയ്ക്കുക: ഒരു ഡ്രോയർ, ഒരു ഷെൽഫ് അല്ലെങ്കിൽ ഒരു മേശ മാത്രം ക്രമപ്പെടുത്തുക.

• ഒരു വർഷത്തെ ഉപയോഗം വിലയിരുത്തുക: അപൂർവമായി മാത്രം ഉപയോഗിക്കുന്ന വസ്തുക്കൾ യഥാർഥത്തിൽ ആവശ്യമാണോ എന്ന് ചിന്തിക്കുക. സീസണൽ വസ്തുക്കൾക്കും അടിയന്തര ആവശ്യങ്ങൾക്കുമുള്ളവ ഒഴിവാക്കേണ്ടതില്ല.

• വസ്തുക്കൾ മൂന്ന് വിഭാഗങ്ങളാക്കുക: സൂക്ഷിക്കേണ്ടവ, മറ്റുള്ളവർക്ക് നൽകാവുന്നവ, പുനരുപയോഗത്തിനോ സംസ്കരണത്തിനോ കൈമാറേണ്ടവ.

• പുതിയത് വാങ്ങുന്നതിന് മുമ്പ് പഴയത് പരിശോധിക്കുക: സമാനമായ വസ്തുക്കൾ വീട്ടിൽ ഉണ്ടോ എന്ന് ഉറപ്പാക്കുക.

• ഓർമ്മകൾക്ക് ഇടം നൽകുക: വൈകാരിക പ്രാധാന്യമുള്ള വസ്തുക്കൾ സൂക്ഷിക്കാം; എന്നാൽ അവയെല്ലാം ഒരുമിച്ച് ശേഖരിക്കേണ്ടതില്ല.