വെള്ളം തിളപ്പിക്കുന്നതാണോ ഫിൽട്ടർ ചെയ്യുന്നതാണോ ആരോ​ഗ്യത്തിന് സുരക്ഷിതം?

കുടിവെള്ളമില്ലാതെ മനുഷ്യന് അതിജീവനം പ്രയാസമാണ്. പല വീടുകളിലും ഇന്നും വെള്ളം തിളപ്പിച്ചാണ് കുടിക്കുന്നത്. കൂടാതെ വാട്ടർ ഫിട്ടർ സംവിധാനങ്ങളും വ്യാപകമായി ഉപയോ​ഗിക്കുന്നുണ്ട്. എന്നാൽ, ഈ രണ്ടിൽ ഏതാണ് കൂടുതൽ സുരക്ഷിതം?

ആരോ​ഗ്യ വാർത്തകൾ കൂടുതൽ അറിയാൻ വാട്സാപ്പ് ഗ്രൂപ്പിൽ അംഗമാകൂ.

ഇവിടെ ക്ലിക്ക്  ചെയ്യുക

വെള്ളം തിളപ്പിക്കുമ്പോൾ അതിലുള്ള ബാക്ടീരിയ, വൈറസ്, പരാസൈറ്റുകൾ പോലുള്ള മിക്ക രോഗാണുക്കളും നശിക്കുന്നു. അതിനാൽ രോഗാണുക്കൾ മൂലമുള്ള വയറിളക്കം, ടൈഫോയ്ഡ്, കോളറ തുടങ്ങിയ രോഗ സാധ്യത കുറയ്ക്കാൻ ഇത് ഫലപ്രദമാണ്. ചെലവു കുറഞ്ഞ് ഏറ്റവും മികച്ച രീതിയിൽ രോ​ഗങ്ങളെ അകറ്റിനിർത്താൻ സഹായിക്കുന്ന രീതികൂടിയാണിത്.

എന്നാൽ തിളപ്പിച്ച വെള്ളത്തിന് ചില പരിമിതികളുമുണ്ട്. ലെഡ്, ആഴ്‌സനിക്, ഫ്ലൂറൈഡ്, നൈട്രേറ്റ് തുടങ്ങിയ രാസമലിനീകരണം നീക്കം ചെയ്യാൻ തിളപ്പിക്കലിലൂടെ കഴിയില്ല. കൂടാതെ വെള്ളത്തിലെ പൊടി, മണൽ, മറ്റ് അഴുക്കുകളും ഇല്ലാതാക്കാനാകില്ല. മാത്രമല്ല, തിളപ്പിച്ച ശേഷം തുറന്ന പാത്രത്തിൽ സൂക്ഷിച്ചാൽ വീണ്ടും രോഗാണുക്കൾ കലരാം. ഇന്ധനവും സമയവും ആവശ്യമാണ്. വെള്ളത്തിൽ രാസവസ്തുക്കളോ ഭാരലോഹങ്ങളോ ഉണ്ടെങ്കിൽ തിളപ്പിക്കൽ മാത്രം മതിയാകില്ല. മറിച്ച് വെള്ളം തിളപ്പിക്കുമ്പോൾ വെള്ളത്തിന്റെ അളവ് കുറയുന്നതിനാൽ ചില ലവണങ്ങളുടെ സാന്ദ്രത കൂടാനും സാധ്യതയുണ്ട്.

ഫിൽറ്റർ ചെയ്ത വെള്ളം

പല സാങ്കേതിക വിദ്യകളും ഉപയോ​ഗിച്ചാണ് വാട്ടർ പ്യൂരിഫയർ പ്രവർത്തിക്കുന്നത്.

• RO (Reverse Osmosis)

ലവണങ്ങളും ഭാരലോഹങ്ങളും ചില രാസവസ്തുക്കളും നീക്കം ചെയ്യുന്നു.

TDS കൂടുതലുള്ള വെള്ളത്തിന് അനുയോജ്യം.

• UV (Ultraviolet)

രോഗാണുക്കളെ പ്രവർത്തനരഹിതമാക്കുന്നു.

എന്നാൽ നിർജ്ജീവമായ രോഗാണുക്കളെ വെള്ളത്തിൽ നിന്ന് നീക്കം ചെയ്യുന്നില്ല.

• UF (Ultrafiltration)

വലിയ അഴുക്കുകളും ചില സൂക്ഷ്മജീവികളെയും തടയുന്നു.

വൈദ്യുതി ഇല്ലാതെയും പ്രവർത്തിക്കുന്ന മോഡലുകൾ ലഭ്യമാണ്.

ഫിൽറ്റർ ചെയ്ത വെള്ളത്തിന്റെ ഗുണങ്ങൾ

• വെള്ളത്തിലെ അഴുക്കുകൾ കുറയ്ക്കുന്നു.

• പല മോഡലുകളും രോഗാണുക്കളെ നിയന്ത്രിക്കുന്നു.

• ചില ഫിൽറ്ററുകൾ രാസമലിനീകരണവും ഭാരലോഹങ്ങളും കുറയ്ക്കുന്നു.

• ദിവസേന ഉപയോഗിക്കാൻ സൗകര്യപ്രദം.

• രുചിയും മണവും മെച്ചപ്പെടുത്താൻ സഹായിക്കും.

ഇങ്ങനെയൊക്കെ ആണെങ്കിലും ഫിൽറ്ററുകൾ പ്രവർത്തിക്കുന്നതിൽ ചില പരിമിതികളുണ്ട്. എല്ലാ ഫിൽറ്ററുകളും ഒരുപോലെ പ്രവർത്തിക്കില്ല. കൃത്യസമയത്ത് സർവീസ് ചെയ്യാത്ത ഫിൽറ്റർ തന്നെ മലിനീകരണത്തിന് കാരണമാകാം. RO ഫിൽറ്ററുകൾ ചില ഗുണകരമായ ധാതുക്കളും കുറയ്ക്കാം. എന്നാൽ വാങ്ങുന്നതിനും പരിപാലിക്കുന്നതിനും ചെലവുണ്ട്.

ഫിൽറ്റർ വെള്ളം വീണ്ടും തിളപ്പിക്കണോ?

സാധാരണ സാഹചര്യങ്ങളിൽ ഗുണമേന്മയുള്ള, കൃത്യമായി പരിപാലിക്കുന്ന പ്യൂരിഫയറിൽ നിന്നുള്ള വെള്ളം വീണ്ടും തിളപ്പിക്കേണ്ട ആവശ്യമില്ല. എന്നാൽ ചില സാഹചര്യങ്ങളിൽ തിളപ്പിക്കുന്നത് നല്ലതാണ്.

• വെള്ളപ്പൊക്കത്തിന് ശേഷം.

• ജലവിതരണത്തിൽ മലിനീകരണ മുന്നറിയിപ്പ് ലഭിച്ചാൽ.

• പ്രതിരോധശേഷി വളരെ കുറഞ്ഞവർ, അവയവമാറ്റ ശസ്ത്രക്രിയ നടത്തിയവർ തുടങ്ങിയവർക്ക് ഡോക്ടർ നിർദേശിച്ചാൽ.

തിളപ്പിച്ച വെള്ളം സൂക്ഷിക്കുമ്പോൾ ശ്രദ്ധിക്കേണ്ടത്

• വൃത്തിയുള്ള, മൂടിയ പാത്രത്തിൽ സൂക്ഷിക്കുക.

• കൈ മുക്കി വെള്ളം എടുക്കരുത്.

• വൃത്തിയുള്ള ലഡിൽ അല്ലെങ്കിൽ ടാപ്പുള്ള പാത്രം ഉപയോഗിക്കുക.

• കഴിയുന്നത്ര 24 മണിക്കൂറിനുള്ളിൽ ഉപയോഗിക്കുക.

ഏതാണ് മികച്ചത്

ഒരു രീതിയും എല്ലാ സാഹചര്യങ്ങൾക്കും ഒരുപോലെ അനുയോജ്യമല്ല. രോഗാണു മലിനീകരണമാണ് പ്രധാന പ്രശ്നമെങ്കിൽ, തിളപ്പിച്ച വെള്ളം മികച്ച സുരക്ഷ നൽകും. രാസമലിനീകരണം, ലവണങ്ങൾ, ഭാരലോഹങ്ങൾ എന്നിവയുടെ സാധ്യതയുണ്ടെങ്കിൽ, അനുയോജ്യമായ വാട്ടർ പ്യൂരിഫയർ കൂടുതൽ ഫലപ്രദമാണ്.