'മഴ മാറി മാനം തെളിഞ്ഞു', കാലാവസ്ഥാമാറ്റം പനി കൂട്ടുമോ?

ഓണാഘാഷത്തിൻ്റെ തിരക്കും സന്തോഷവും കഴിഞ്ഞ് സാധാരണ ജീവിതത്തിലേക്ക് ആളുകൾ മടങ്ങിവരുകയാണ്. ദൈനംദിന ശീലങ്ങളിലുണ്ടായ മാറ്റങ്ങളും കാലാവസ്ഥ വ്യതിയാനവും പലരുടെ ആരോഗ്യത്തെ ബാധിച്ചിട്ടുണ്ടെന്നാണ് വിലയിരുത്തൽ. പനി, ജലദോഷം, ചുമ, തൊണ്ടവേദന തുടങ്ങിയ ശ്വാസകോശ സംബന്ധമായ അസുഖങ്ങൾ ഇപ്പോൾ കൂടുതലായി റിപ്പോർട്ട് ചെയ്യപ്പെടുന്നു. പ്രത്യേകിച്ച് മഴയും വെയിലും മാറിമാറി അനുഭവപ്പെടുന്ന സാഹചര്യത്തിൽ ശരീരത്തിന്റെ പ്രതിരോധ സംവിധാനത്തെയും ദൈനംദിന ആരോഗ്യശീലങ്ങളെയും കൂടുതൽ ശ്രദ്ധിക്കേണ്ടതുണ്ട്.

ആരോ​ഗ്യ വാർത്തകൾ കൂടുതൽ അറിയാൻ വാട്സാപ്പ് ഗ്രൂപ്പിൽ അംഗമാകൂ.

ഇവിടെ ക്ലിക്ക്  ചെയ്യുക

പനി സാധാരണയായി വൈറസ്, ബാക്ടീരിയ തുടങ്ങിയ രോഗാണുക്കൾ മൂലമാണ് ഉണ്ടാകുന്നത്. എന്നാൽ താപനിലയിലും ഈർപ്പത്തിലും ഉണ്ടാകുന്ന മാറ്റങ്ങൾ ചില ശ്വാസകോശ വൈറസുകളുടെ വ്യാപനത്തിന് കാരണമാകാം. മഴക്കാലത്തും കാലാവസ്ഥ മാറുന്ന സമയത്തും വീടുകളിലും ഓഫീസുകളിലും സ്കൂളുകളിലും ആളുകൾ അടുത്തടുത്തായി കഴിയുന്നത് രോഗാണുക്കൾ ഒരാളിൽ നിന്ന് മറ്റൊരാളിലേക്ക് പകരാനുള്ള സാധ്യത വർധിപ്പിക്കും. കൂടാതെ ഉറക്കക്കുറവ്, ഭക്ഷണക്രമത്തിലെ മാറ്റം, വെള്ളം കുറച്ച് കുടിക്കൽ തുടങ്ങിയവയും ശരീരത്തിന്റെ പൊതുവായ ആരോഗ്യത്തെ ബാധിക്കാം.

പനി വന്നാൽ ആദ്യം ശ്രദ്ധിക്കേണ്ടത്

പനി ഒരു ലക്ഷണമാണ്, രോഗത്തിന്റെ കാരണം മനസ്സിലാക്കുകയാണ് പ്രധാനപ്പെട്ടത്. പനിയോടൊപ്പം ചുമ, മൂക്കൊലിപ്പ്, തൊണ്ടവേദന, ശരീരവേദന, തലവേദന, ക്ഷീണം തുടങ്ങിയ ലക്ഷണങ്ങൾ ഉണ്ടാകാം.

പനി വന്നാൽ;

• മതിയായ വിശ്രമം എടുക്കുക.

• വെള്ളം, കഞ്ഞിവെള്ളം, സൂപ്പ്, കഞ്ഞി തുടങ്ങിയവ ആവശ്യത്തിന് കഴിക്കുക.

• എളുപ്പം ദഹിക്കുന്ന പോഷകസമൃദ്ധമായ ഭക്ഷണം കഴിക്കുക.

• ശരീരത്തിൽ ജലാംശം കുറയുന്നില്ലെന്ന് ഉറപ്പാക്കുക.

• പനി ഉള്ളപ്പോൾ മറ്റുള്ളവരുമായി അടുത്ത സമ്പർക്കം പരമാവധി കുറയ്ക്കുക.

• കൈകൾ ഇടയ്ക്കിടെ സോപ്പും വെള്ളവും ഉപയോഗിച്ച് കഴുകുക.

• ചുമയ്ക്കുമ്പോഴും തുമ്മുമ്പോഴും ടിഷ്യൂ അല്ലെങ്കിൽ കൈമുട്ടിന്റെ മടക്ക് ഉപയോഗിച്ച് വായും മൂക്കും മൂടുക.

സ്വയം ആന്റിബയോട്ടിക് കഴിക്കരുത്

പനി വന്നാൽ ഉടൻ ആന്റിബയോട്ടിക് കഴിക്കുന്ന ശീലം ഒഴിവാക്കണം. സാധാരണ ജലദോഷത്തിനും പല വൈറൽ അണുബാധകൾക്കും ആന്റിബയോട്ടിക്കുകൾ ഫലപ്രദമല്ല. ഡോക്ടറുടെ നിർദേശമില്ലാതെ ആന്റിബയോട്ടിക് ഉപയോഗിക്കുന്നത് മരുന്നുകളോടുള്ള പ്രതിരോധശേഷി (antimicrobial resistance) വർധിപ്പിക്കാനും പാർശ്വഫലങ്ങൾ ഉണ്ടാക്കാനും ഇടയാക്കാം. മറ്റൊരാൾക്ക് ഡോക്ടർ നിർദേശിച്ച മരുന്ന് സ്വന്തം പനിക്ക് ഉപയോഗിക്കുന്നതും ഒഴിവാക്കണം.

കാലാവസ്ഥ മാറുന്ന സമയത്ത് ശരീരത്തിന് ആവശ്യമായ പോഷകങ്ങൾ ലഭിക്കുന്ന തരത്തിലുള്ള ഭക്ഷണക്രമം പിന്തുടരുന്നത് പ്രധാനമാണ്.

ഡയറ്റിൽ ശ്രദ്ധിക്കാം

• പച്ചക്കറികളും പഴങ്ങളും

• പയർവർഗങ്ങൾ

• മുട്ട, മത്സ്യം തുടങ്ങിയ പ്രോട്ടീൻ സ്രോതസ്സുകൾ

• മുഴുവൻ ധാന്യങ്ങൾ

• ആവശ്യമായ അളവിൽ ആരോഗ്യകരമായ കൊഴുപ്പ്

തിളപ്പിച്ചാറിയ വെള്ളം മാത്രം കുടിക്കാൻ ശ്രദ്ധിക്കുക, പ്രത്യേകിച്ച് പനിക്കാലത്ത്.

വീടും പരിസരവും വൃത്തിയായി സൂക്ഷിക്കുക

• കാലാവസ്ഥ മാറുന്ന സമയത്ത് വീടിനുള്ളിലെ വായുസഞ്ചാരത്തിനും ശുചിത്വത്തിനും ശ്രദ്ധ നൽകണം. ജനലുകളും വാതിലുകളും സാധ്യമാകുമ്പോൾ തുറന്ന് ശുദ്ധവായു സഞ്ചരിക്കാൻ അനുവദിക്കുക.

• വീട്ടിലെ പതിവായി സ്പർശിക്കുന്ന സ്ഥലങ്ങൾ, ഉദാഹരണത്തിന് വാതിൽപ്പിടികൾ, സ്വിച്ചുകൾ, മൊബൈൽ ഫോൺ തുടങ്ങിയവ വൃത്തിയായി സൂക്ഷിക്കുന്നതും നല്ലതാണ്.

• മഴയ്ക്ക് ശേഷം വീടിന് ചുറ്റും വെള്ളം കെട്ടിക്കിടക്കാതിരിക്കാനും ശ്രദ്ധിക്കണം. കൊതുകുകളുടെ പെരുകൽ തടയുന്നത് ഡെങ്കിപ്പനി, ചിക്കുൻഗുനിയ തുടങ്ങിയ കൊതുകുജന്യ രോഗങ്ങളുടെ സാധ്യത കുറയ്ക്കാൻ സഹായിക്കും.

പ്രായമായവർ, ഗർഭിണികൾ, പ്രതിരോധശേഷി കുറഞ്ഞവർ, പ്രമേഹം, ഹൃദ്രോഗം, ശ്വാസകോശ രോഗങ്ങൾ തുടങ്ങിയ ദീർഘകാല ആരോഗ്യപ്രശ്നങ്ങളുള്ളവർ എന്നിവർക്ക് അണുബാധകൾ കൂടുതൽ ഗുരുതരമാകാനുള്ള സാധ്യതയുണ്ട്. ഇവർക്ക് പനി വന്നാൽ സ്വയം ചികിത്സിക്കുന്നതിന് പകരം ആരോഗ്യപ്രവർത്തകരുടെ നിർദേശം തേടുന്നതാണ് ഉചിതം.

കാലാവസ്ഥ മാറിയാൽ പനി വരുന്നത് സ്വാഭാവികമാണെന്ന് കരുതി എല്ലാ പനിയും അവഗണിക്കരുത്. സാധാരണ വൈറൽ പനി മുതൽ ഡെങ്കിപ്പനി പോലുള്ള രോഗങ്ങൾ വരെ പനിക്ക് പല കാരണങ്ങളുണ്ടാകാം. അതിനാൽ പനിയോടൊപ്പം ഉണ്ടാകുന്ന മറ്റ് ലക്ഷണങ്ങളും രോഗിയുടെ പൊതുവായ ആരോഗ്യനിലയും പരിഗണിക്കണം. രോഗലക്ഷണങ്ങൾ ശക്തമാകുകയോ നീണ്ടുനിൽക്കുകയോ ചെയ്താൽ ഡോക്ടറുടെ നിർദേശം തേടുന്നതാണ് സുരക്ഷിതം.