മഴക്കെടുതി നേരിടാൻ ഭരണകൂടം പൂർണ്ണസജ്ജം: വട്ടവടയിലുണ്ടായത് പെട്ടെന്നുള്ള കാലാവസ്ഥാ വ്യതിയാനമെന്ന് മന്ത്രി അനൂപ് ജേക്കബ്

അടിമാലി: ഇടുക്കി ജില്ലയിൽ മഴക്കെടുതി നേരിടാൻ ജില്ലാ ഭരണകൂടം പൂർണ്ണസജ്ജമാണെന്ന് മന്ത്രി അനൂപ് ജേക്കബ്. പെട്ടെന്നുണ്ടായ കാലാവസ്ഥാ മാറ്റമാണ് കഴിഞ്ഞദിവസം വട്ടവടയിൽ ഉണ്ടായ മണ്ണിടിച്ചിൽ ദുരന്തത്തിന് കാരണമായതെന്നും അദ്ദേഹം അടിമാലിയിൽ പറഞ്ഞു. വട്ടവടയിലുണ്ടായ മണ്ണിടിച്ചിലിൽ ജീവൻ നഷ്ടപ്പെട്ടവരുടെ മൃതദേഹങ്ങൾ സൂക്ഷിച്ചിരിക്കുന്ന അടിമാലി താലൂക്ക് ആശുപത്രിയിലെത്തി അന്തിമോപചാരം അർപ്പിച്ച ശേഷം മാധ്യമങ്ങളോട് സംസാരിക്കുകയായിരുന്നു മന്ത്രി.

ജില്ലയിൽ നിലവിൽ മഴയുടെ തീവ്രത അല്പം കുറഞ്ഞിട്ടുണ്ടെങ്കിലും അതീവ ജാഗ്രത തുടരേണ്ടതുണ്ട്. മുൻകരുതലിന്റെ ഭാഗമായി മലയോര മേഖലകളിലെ രാത്രികാല യാത്രകൾ ഉൾപ്പെടെയുള്ള കാര്യങ്ങളിൽ ഏർപ്പെടുത്തിയിട്ടുള്ള നിയന്ത്രണങ്ങൾ തുടരുമെന്നും മന്ത്രി വ്യക്തമാക്കി. പൊതുജനങ്ങൾ സുരക്ഷാ നിർദ്ദേശങ്ങൾ കർശനമായി പാലിക്കണം. വട്ടവട ദുരന്തത്തിൽ മരിച്ചവരുടെ സംസ്കാര ചടങ്ങുകൾ നടത്തുന്നതിന് ആവശ്യമായ എല്ലാ ഇടപെടലുകളും സർക്കാർ നടത്തിയിട്ടുണ്ട്. പരിക്കേറ്റ് ആശുപത്രിയിൽ ചികിത്സയിൽ കഴിയുന്ന ആളുകളുടെ നിലയിൽ ആശങ്കപ്പെടേണ്ടതില്ലെന്നും അവർക്ക് ആവശ്യമായ വിദഗ്ദ്ധ ചികിത്സ ഉറപ്പാക്കിയിട്ടുണ്ടെന്നും മന്ത്രി പറഞ്ഞു. ഉരുൾപൊട്ടലുണ്ടായ പഴംപിള്ളിച്ചാലിൽ നിന്ന് അഞ്ച് കുടുംബങ്ങളെ സുരക്ഷിത കേന്ദ്രങ്ങളിലേക്ക് മാറ്റിപ്പാർപ്പിച്ചിട്ടുണ്ട്. ദുരിതബാധിതർക്ക് ആവശ്യമായ എല്ലാ ക്രമീകരണങ്ങളുമായി ജില്ലാ ഭരണകൂടവും സർക്കാരും ഒപ്പമുണ്ടെന്നും മന്ത്രി കൂട്ടിച്ചേർത്തു.