വയോധികയുടെ മാല കവർന്ന കേസ്; യുവാവ് എറണാകുളത്തുനിന്ന് പിടിയിൽ

തളിപ്പറമ്പ്: തളിപ്പറമ്പ് പൂമംഗലത്ത് വീട്ടിൽ ഒറ്റയ്ക്ക് താമസിക്കുന്ന വയോധികയുടെ സ്വർണ്ണമാല പിടിച്ചുപറിച്ച് കടന്നുകളഞ്ഞ കേസിലെ പ്രതിയെ പൊലീസ് അതിവേഗം പിടികൂടി. ഗൂഡല്ലൂർ നീലഗിരി സ്വദേശിയും നിലവിൽ വയനാട് മീനങ്ങാടിയിൽ താമസിച്ചുവരികയുമായിരുന്ന ഷിബിൻ (21) ആണ് തളിപ്പറമ്പ് പൊലീസിന്റെ പിടിയിലായത്. പ്രദേശത്ത് കുലുക്കി സർബത്ത് കട നടത്തിവരികയായിരുന്ന ഇയാൾ കവർച്ചയ്ക്ക് ശേഷം ഒളിവിൽ പോവുകയായിരുന്നു. തുടർന്ന് നടത്തിയ ശാസ്ത്രീയ അന്വേഷണത്തിനൊടുവിൽ എറണാകുളം സെന്ററിൽ വെച്ചാണ് തളിപ്പറമ്പ് പൊലീസ് സംഘം പ്രതിയെ തന്ത്രപൂർവ്വം വലയിലാക്കിയത്.

തളിപ്പറമ്പ് പൊലീസ് സ്റ്റേഷൻ എസ്.എച്ച്.ഒ ശ്രീഹരിയുടെ നിർദ്ദേശപ്രകാരം എസ്.ഐ സാംസൺ സി.ജി, എസ്.ഐ ടോമി, എ.എസ്.ഐ ഇബ്രാഹിം സീരന്തകത്ത്, സി.പി.ഒമാരായ മഹേഷ്, അബ്ദുൾ അസീസ് എന്നിവരടങ്ങിയ പ്രത്യേക അന്വേഷണ സംഘമാണ് പ്രതിയെ കസ്റ്റഡിയിലെടുത്തത്. ഇയാളെ തളിപ്പറമ്പിലെത്തിച്ച് ചോദ്യം ചെയ്ത ശേഷം കോടതിയിൽ ഹാജരാക്കും.