ഷൊർണൂർ: ഷൊർണൂർ റെയിൽവേ സ്റ്റേഷനിൽ പാളം തെറ്റിയ ട്രെയിൻ നിയന്ത്രണം വിട്ട് മറിയുകയും മറ്റ് ബോഗികളുടെ മുകളിലേക്ക് ഇടിച്ചുകയറി കത്തിയെരിയുകയും ചെയ്ത സംഭവം കണ്ടുനിന്നവരെ നടുക്കി.

ഏതാണ് ട്രെയിൻ, അപകടം എങ്ങനെ സംഭവിച്ചു, എത്ര യാത്രക്കാർക്ക് പരിക്കേറ്റു എന്നിങ്ങനെയുള്ള നിരവധി ചോദ്യങ്ങളും ആശങ്കകളും ഉയർന്നുവന്നെങ്കിലും ഇത് റെയിൽവേ നടത്തിയ മോക് ഡ്രില്ലായിരുന്നു. അടിയന്തര സാഹചര്യങ്ങളിൽ ഇത്തരം വലിയൊരു അപകടമുണ്ടായാൽ എന്ത് ചെയ്യണമെന്ന് റെയിൽവേ ഉദ്യോഗസ്ഥരെയും ജീവനക്കാരെയും പഠിപ്പിക്കുന്നതിന്റെ ഭാഗമായി നടത്തിയ പരിശീലനമായിരുന്നു ഇത്.

പരിശീലനത്തിലെ അപകടദൃശ്യങ്ങളുടെ ഭീകരത കണ്ടുനിന്നവരുടെ ചങ്കിടിപ്പേറ്റുന്നതായിരുന്നു. എങ്കിലും ഇത്തരം നിർണായക ഘട്ടങ്ങളെ നേരിടാൻ ജീവനക്കാർ കാര്യങ്ങൾ പഠിച്ചുവെക്കുന്നത് ഭാവിയിൽ ഒരുപാട് പേർക്ക് ജീവൻ രക്ഷിക്കാൻ ഉപകരിക്കുന്ന കാര്യമല്ലേ എന്ന് ബോധ്യപ്പെട്ടതോടെയാണ് അപകടം കണ്ടുനിന്നവർക്ക് ശ്വാസം നേരെ വീണത്.