തമിഴ് സിനിമാ പ്രേക്ഷകരുടെ പ്രിയപ്പെട്ട ഓൺസ്ക്രീൻ താരജോഡിയായിരുന്നു അജിത്തും സിമ്രാനും. ഇരുവരുടെയും ഓൺസ്ക്രീൻ കെമിസ്ട്രിക്ക് ഇന്നും ഒട്ടനവധി ആരാധകരാണുള്ളത്. നീണ്ട 25 വർഷത്തിന് ശേഷം അജിത്തും സിമ്രാനും വീണ്ടും ഒന്നിച്ചെത്തുന്നു എന്നാണ് പുതിയ റിപ്പോർട്ടുകൾ. അജിത് നായകനായെത്തുന്ന ​ഗുഡ് ബാഡ് അഗ്ലിയിലാണ് സിമ്രാനും ഒരു സുപ്രധാന വേഷത്തിലെത്തുമെന്ന റിപ്പോർട്ടുകൾ പുറത്തുവന്നിരിക്കുന്നത്.

എന്നാൽ ഇത് സംബന്ധിച്ചുള്ള ഔദ്യോ​ഗിക സ്ഥിരീകരണമൊന്നും പുറത്തുവന്നിട്ടില്ല. എങ്കിലും അജിത് ആരാധകർക്കിടയിൽ ഈ വാർത്ത ചർച്ചയായി കഴിഞ്ഞു. മുൻപ് അവൾ വരുവാല (1998), വാലി (1999), ഉന്നൈ കൊട് എന്നൈ തരുവേൻ (2000) എന്നീ ചിത്രങ്ങളിൽ അജിത്തും സിമ്രാനും ഒന്നിച്ചെത്തിയിരുന്നു. ​അവൾ വരുവാല എന്ന ചിത്രത്തിന്റെ വിജയത്തിന് പിന്നാലെയാണ് വാലിയിലും ഹിറ്റ് ജോഡികൾ ഒന്നിച്ചെത്തിയത്. ‌‌‌

തമിഴ്, തെലുങ്ക്, ഹിന്ദി, കന്നഡ, മലയാളം സിനിമകളിലൂടെ ശ്രദ്ധേയ ആയ സിമ്രാൻ വിവാഹത്തോടെ സിനിമയിൽ നിന്ന് ഇടവേളയെടുത്തിരുന്നു. പിന്നീട് 2014 ലാണ് സിമ്രാൻ അഭിനയ രം​ഗത്തേക്ക് തിരികെ വരുന്നത്. 2023 ൽ പുറത്തിറങ്ങിയ ​ഗുൽമോഹർ ആണ് സിമ്രാന്റേതായി ഒടുവിൽ പ്രേക്ഷകരിലേക്കെത്തിയ ചിത്രം. അതേസമയം ശബ്ദം എന്ന ചിത്രമാണ് സിമ്രാന്റേതായി റിലീസിനായി തയ്യാറെടുക്കുന്ന ചിത്രം.

അറിവഴഗൻ വെങ്കിടാചലം സംവിധാനം ചെയ്യുന്ന ചിത്രത്തിൽ ആദി പിനിഷെട്ടിയാണ് നായകനായെത്തുന്നത്. ഈ മാസം 28 നാണ് ചിത്രം തിയറ്ററുകളിലെത്തുക. ഗുഡ് ബാഡ് അ​ഗ്ലിയിൽ ശ്രീലീലയും മീനയും പ്രധാന വേഷങ്ങളിലെത്തുമെന്നും റിപ്പോർട്ടുകൾ പുറത്തുവന്നിരുന്നു. അജിത്ത് മൂന്ന് വ്യത്യസ്ത കഥാപാത്രങ്ങളായാണ് ചിത്രത്തിലെത്തുക.

'വില്ലൻ വരുന്നതിന് മുന്നേയുള്ള നായകന്റെ 'അഴിഞ്ഞാട്ടം'; മമ്മൂക്കയുടെ കിടിലൻ ആക്ഷൻ രം​ഗം, 'ബസൂക്ക' പുതിയ പോസ്റ്റർ

ആദിക് രവിചന്ദ്രൻ സംവിധാനം ചെയ്യുന്ന ചിത്രം ഏപ്രിൽ 10 ന് തിയറ്ററുകളിലെത്തും. മൈത്രി മൂവി മേക്കേഴ്സ് ആണ് ചിത്രത്തിന്റെ നിർമാണം. വിടാമുയർച്ചിയാണ് അജിത്തിന്റേതായി ഒടുവിൽ പ്രേക്ഷകരിലേക്കെത്തിയ ചിത്രം.