'നീ ഉയരങ്ങളില്‍ എത്തണം എന്നു കരുതി ശാസിച്ച ശാസനകള്‍ക്കെല്ലാം മാപ്പ്': സഹോദരന്റെ വേർപാടിൽ സുജിത്ത് വാസു​ദേവ്

ഛായാ​ഗ്രാഹകനും സംവിധായകനുമായ സുജിത്ത് വാസുദേവിന്റെ സഹോദരൻ രഞ്ജിത്ത് വാസുദേവ് അന്തരിച്ചു. ഷാർജയിൽ വച്ചായിരുന്നു അന്ത്യം. സഹോദരന്റെ അപ്രതീക്ഷിത വിയോ​ഗത്തിൽ വേദന പങ്കുവച്ച് സുജിത്ത് വാസുദേവൻ കുറിപ്പ് പങ്കുവച്ചു.

നീ ഉയരങ്ങളില്‍ എത്തണം എന്നു കരുതി ശാസിച്ച ശാസനകള്‍ക്കെല്ലാം മാപ്പ്. ഞാന്‍ കരുതിയ ഉയരത്തിന്റെ അര്‍ത്ഥം ഇതായിരുന്നില്ല- എന്നാണ് ഇൻസ്റ്റ​ഗ്രാം സ്റ്റോറിയായി കുറിച്ചത്. കൂടാതെ സഹോദരനൊപ്പമുള്ള ചിത്രത്തിനൊപ്പം വികാരനിർഭരമായ കുറിപ്പും സുജിത്ത് പോസ്റ്റ് ചെയ്തിട്ടുണ്ട്.

‘സഹോദര ബന്ധത്തിന്റെ അവസാനം. നമ്മുടെ കുടുംബത്തിന്റെ നെടുംതൂണായിരുന്നു നീ. അമ്മയും അച്ഛനും സന്തോഷത്തോടെ ഇരിക്കാൻ കാരണം തന്നെ നീ ആയിരുന്നു. ഇന്നലെ വരെ അവരെ ഓർത്ത് ഞാൻ വിഷമിച്ചിരുന്നില്ല. ഇപ്പോൾ ഞാൻ ആശങ്കയിലാണ്. അവരെ എങ്ങനെയാണ് മോക്കേണ്ടതെന്ന് എനിക്ക് അറിയില്ല, സത്യത്തിൽ എനിക്ക് അവരെക്കുറിച്ച് കൂടുതലൊന്നും അറിയില്ല. കാരണം അവരുടെ ലോകത്തിലെ സന്തോഷം നീ ആയിരുന്നു. ഇനി ഇതൊക്കെ ഞാൻ പഠിച്ചു തുടങ്ങണം. എനിക്ക് അവരെ എത്രത്തോളം തൃപ്തിപ്പെടുത്താൻ കഴിയുമെന്ന് എനിക്കറിയില്ല, പക്ഷേ ഞാൻ നിനക്കു വാക്കു തരുന്നു. അവരെ സന്തോഷിപ്പിക്കാൻ ഞാൻ പരമാവധി ശ്രമിക്കും.’–സുജിത് വാസുദേവ് കുറിച്ചു.