റാപ്പര്‍ വേടന് മികച്ച ഗാനരചയിതാവിനുള്ള സംസ്ഥാന ചലച്ചിത്ര പുരസ്‌കാരം നല്‍കിയതില്‍ വിമര്‍ശനവുമായി ദീദി ദാമോദരന്‍. വേടന് നല്‍കിയ പുരസ്‌കാരം അന്യായം ആണെന്നാണ് ദീദി പറയുന്നത്. സ്ത്രീ പീഡകരെ സംരക്ഷിക്കില്ലെന്ന സര്‍ക്കാരിന്റെ നയ പ്രഖ്യാപനങ്ങളുടെ ലംഘനം ആണെന്നും ദീദി ദാമോദരന്‍ പറയുന്നു.

ഈ തീരുമാനം ചലച്ചിത്ര ചരിത്രത്തില്‍ എഴുതിച്ചേര്‍ത്തതിന് ഫിലിം ജൂറി പെണ്‍കേരളത്തോട് മാപ്പ് പറയാന്‍ ബാധ്യസ്ഥരാണെന്നും ദീദി പറയുന്നു. പീഡന കേസുകളില്‍ കുറ്റാരോപിതനായ വേടന് പുരസ്‌കാരം നല്‍കിയതിനെതിരെ വ്യാപക വിമര്‍ശനം ഉയരുന്ന സാഹചര്യത്തിലാണ് ദീദി ദാമോദരന്റെ പ്രതികരണം. ദീദി ദാമോദരന്റെ വാക്കുകള്‍:

''വിയര്‍പ്പ് തുന്നിയിട്ട കുപ്പായം' എന്ന വരികള്‍ ഉദാത്തമാണ്. എന്നാല്‍ ഇരുളിന്റെ മറവില്‍ ആ പരാതിക്കാര്‍ക്കേറ്റ മുറിവില്‍ നിന്നൊഴുകിയ ചോരയില്‍ ആ പുരസ്‌കാരം ഒരന്യായമാണ്. ഒരു വാഴ്ത്തുപാട്ടുകള്‍ക്കും ആ പാതകം മായ്ക്കാനോ മറയ്ക്കാനോ ആവില്ല. സ്ത്രീ പീഡകരെ സംരക്ഷിക്കില്ല എന്ന് ഫിലിം കോണ്‍ക്ലേവില്‍ സര്‍ക്കാര്‍ നടത്തിയ നയപ്രഖ്യാപനങ്ങളുടെ ബ്രീച്ച് ഓഫ് ട്രസ്റ്റ് ആണ് ജൂറി തീരുമാനം . കോടതി കയറിയാല്‍ പോലും ഇനി റദ്ദാക്കാനാവാത്ത ആ തീരുമാനം ചലച്ചിത്ര ചരിത്രത്തില്‍ എഴുതിച്ചേര്‍ത്തതിന് ഫിലിം ജൂറി പെണ്‍കേരളത്തോട് മാപ്പ് പറയാന്‍ ബാധ്യസ്ഥരാണ്''.

മഞ്ഞുമ്മല്‍ ബോയ്‌സ് സിനിമയിലെ കുതന്ത്രം എന്ന പാട്ടാണ് വേടനെ പുരസ്‌കാരത്തിന് അര്‍ഹനാക്കിയത്. അതേസമയം ലൈംഗിക പീഡന കേസുകള്‍ നിലനില്‍ക്കെ വേടന് പുരസ്‌കാരം നല്‍കാനുള്ള തീരുമാനം ശരിയായില്ലെന്നാണ് വിമര്‍ശകര്‍ പറയുന്നത്.