ഒടിടിയിൽ തിളങ്ങാനാകുമോ ദിലീപ് ചിത്രത്തിന് ? 'ഭഭബ' സ്ട്രീമിങ് തീയതി പുറത്ത്, എവിടെ കാണാം

ഏറെ നാളത്തെ ഇടവേളയ്ക്ക് ശേഷം ദിലീപും മോഹൻലാലും ഒന്നിച്ചെത്തിയ ചിത്രമാണ് ഭഭബ (ഭയം, ഭക്തി, ബഹുമാനം). വൻ ഹൈപ്പോടെയാണ് ചിത്രം തിയറ്ററുകളിലെത്തിയതെങ്കിലും ബോക്സ് ഓഫീസിൽ ഭഭബ തകർന്നടിഞ്ഞു. ഇപ്പോഴിതാ ചിത്രം ഒടിടി റിലീസിനെത്തുകയാണ്. ജനുവരി 16 മുതൽ സീ 5 മലയാളത്തിലൂടെ ചിത്രം സ്ട്രീമിങ് ആരംഭിക്കും. ധനഞ്ജയ് ശങ്കർ ആണ് ചിത്രം സംവിധാനം ചെയ്തത്.

ശ്രീ ഗോകുലം മൂവീസിന്റെ ബാനറിൽ ഗോകുലം ഗോപാലൻ നിർമിച്ച ചിത്രത്തിൽ മോഹൻലാൽ അതിഥി വേഷത്തിൽ എത്തിയിരുന്നു. നൂറിൻ ഷെരീഫും ഭർത്താവ് ഫാഹിം സഫറും ചേർന്നാണ് തിരക്കഥ രചിച്ചിരിക്കുന്നത്.

ദിലീപിനെ കൂടാതെ വിനീത് ശ്രീനിവാസൻ, ധ്യാൻ ശ്രീനിവാസൻ, ബൈജു സന്തോഷ്, ബാലു വർഗീസ്, സാൻഡി, അശോകൻ, സിദ്ധാർഥ് ഭരതൻ, മണിയൻപിള്ള രാജു, ജിബിൻ ഗോപിനാഥ് തുടങ്ങി നിരവധി പേരാണ് ചിത്രത്തിൽ അണിനിരക്കുന്നത്.

അതേസമയം ചിത്രത്തിൽ അഭിനയിച്ചതിന്റെ പേരിൽ നടൻ‌ മോഹൻലാലിനെതിരെ വൻ‌തോതിൽ സൈബർ ആക്രമണവും നടന്നിരുന്നു. ഷാൻ റഹ്മാനും ​ഗോപി സുന്ദറും ആണ് ചിത്രത്തിനായി സം​ഗീതമൊരുക്കിയിരിക്കുന്നത്. തമിഴ് നടൻ എസ് ജെ സൂര്യയും ചിത്രത്തിൽ കാമിയോ റോളിൽ എത്തിയിരുന്നു. നൂറിൻ ഷെരീഫ് ആണ് ചിത്രത്തിൽ നായികയായെത്തുന്നത്.