മമ്മൂട്ടി കമ്പനിയുടെ ഷോർട്ട് ഫിലിം വരുന്നു; സംവിധായകൻ രഞ്ജിത്, നായികയെയും നായകനെയും മനസിലായോ?

മലയാള സിനിമയ്ക്ക് ഒട്ടേറെ ഹിറ്റുകൾ സമ്മാനിച്ച നിർമാണ കമ്പനിയാണ് മമ്മൂട്ടി കമ്പനി. ഇപ്പോഴിതാ മമ്മൂട്ടി കമ്പനി പങ്കുവച്ചിരിക്കുന്ന ഒരു പോസ്റ്റാണ് ആരാധകരുടെ ശ്രദ്ധ പിടിച്ചു പറ്റുന്നത്. കയ്യിലൊരു കട്ടനും എരിയിരുന്ന സി​ഗരറ്റുമായി നിൽക്കുന്ന നായകനെയും അരികിലേക്ക് നടന്നടുക്കുന്ന നായികയെയുമാണ് പോസ്റ്ററിൽ കാണാനാവുക. ഇരുവരുടെയും മുഖം പോസ്റ്ററിൽ വ്യക്തമല്ല.

മമ്മൂട്ടി കമ്പനിയുടെ പുതിയ ഷോർട്ട് ഫിലിമായ 'ആരോ- സംവണ്ണി'ന്റെ ഫസ്റ്റ് ലുക്ക് പോസ്റ്ററാണിത്. സംവിധായകൻ രഞ്ജിത് ആദ്യമായി സംവിധാനം ചെയ്യുന്ന ഷോർട്ട് ഫിലിം എന്ന പ്രത്യേകതയും ആരോയ്ക്കുണ്ട്. വിവിധ ചലച്ചിത്ര മേളകളിൽ പ്രദർശിപ്പിക്കുക എന്ന ലക്ഷ്യത്തോടെയാണ് ഷോർട്ട് ഫിലിം ഒരുക്കിയിരിക്കുന്നത്.

ശ്യാമ പ്രസാദ്, മഞ്ജു വാര്യർ, അസീസ് നെടുമങ്ങാട് എന്നിവരാണ് ഷോർട്ട് ഫിലിമിൽ പ്രധാന വേഷങ്ങളിലെത്തുന്നത്. മഞ്ജു വാര്യരെയും ശ്യാമ പ്രസാദിനെയുമാണ് പോസ്റ്ററിൽ കാണാനാവുക.

വി ആർ സുധീഷ് ആണ് കഥയും സംഭാഷണവുമൊരുക്കിയിരിക്കുന്നത്. ബിജിബാലിന്റേതാണ് സം​ഗീത സംവിധാനം. പ്രശാന്ത് രവീന്ദ്രനാണ് ഛായാ​ഗ്രഹണമൊരുക്കുന്നത്. മമ്മൂട്ടിയെ നായകനാക്കി ഒട്ടേറെ ഹിറ്റ് സിനിമകളൊരുക്കിയ സംവിധായകനാണ് രഞ്ജിത്.