സ്കൂബ ഡൈവിങ്ങിനിടെ അപകടം; 'യാ അലി'യിലൂടെ ശ്രദ്ധേയനായ ​ഗായകൻ സുബീൻ ​ഗാർ​ഗ് വിടവാങ്ങി

മുംബൈ: പ്രശസ്ത ബോളിവുഡ് ​ഗായകനും അസമീസ് കലാകാരനുമായ സുബീൻ ​ഗാർ​ഗ് (52) അന്തരിച്ചു. സിം​ഗപ്പൂരിൽ വച്ച് സ്കൂബ ഡൈവിങ്ങിനിടെ അപകടത്തിൽപ്പെടുകയായിരുന്നു. നോർത്ത് ഈസ്റ്റ് ഇന്ത്യ ഫെസ്റ്റിൽ പങ്കെടുക്കാനായാണ് അദ്ദേഹം സിം​ഗപ്പൂരിലെത്തിയത്. ഡൈവിങ്ങിനിടെ ശ്വാസംമുട്ടൽ അനുഭവപ്പെട്ടെന്നാണ് റിപ്പോർട്ട്.

ഉടനെ തന്നെ പുറത്തെടുത്ത് സിപിആർ നൽകി ആശുപത്രിയിൽ പ്രവേശിപ്പിച്ചെങ്കിലും മരണം സ്ഥിരീകരിക്കുകയായിരുന്നു. സെപ്റ്റംബർ 20, 21 തീയതികളിൽ ഫെസ്റ്റിവലിൽ പരിപാടി അവതരിപ്പിക്കാനായിരുന്നു അദ്ദേഹം സിം​ഗപ്പൂരിലെത്തിയത്. 1972 ൽ മേഘാലയയിൽ ജനിച്ച സുബീൻ ഗാർഗിൻ്റെ യഥാർഥ പേര് സുബീൻ ബർതാക്കൂർ എന്നാണ്.

തൊണ്ണൂറുകളിൽ തൻ്റെ പേര് മാറ്റി ഗോത്രനാമമായ 'ഗാർഗ്' അദ്ദേഹം സ്റ്റേജ് നാമമായി സ്വീകരിച്ചു. തൊണ്ണൂറുകളിൽ അസമിൽ തരംഗമായിരുന്ന സുബീൻ 2006-ൽ പുറത്തിറങ്ങിയ 'ഗ്യാങ്സ്റ്റർ' എന്ന ചിത്രത്തിലെ സൂപ്പർ ഹിറ്റ് ഗാനമായ 'യാ അലി'യിലൂടെയാണ് ദേശീയ തലത്തിൽ ശ്രദ്ധേയനാകുന്നത്.

'സുബഹ് സുബഹ്', 'ക്യാ രാസ് ഹേ' ഉൾപ്പെടെ നിരവധി ബോളിവുഡ് ഹിറ്റുകൾ പിന്നീട് അദ്ദേഹം സംഭാവന ചെയ്തിട്ടുണ്ട്. അസമീസ്, ബം​ഗാളി, ഹിന്ദി ഭാഷകളിൽ പാടിയിട്ടുണ്ട്. മിഷൻ ചൈന, ദിനബന്ധു തുടങ്ങിയ ചിത്രങ്ങൾ സംവിധാനം ചെയ്തിട്ടുണ്ട്.