ആദ്യം ഷാരൂഖ് ഖാന്റെ നായിക; ഇനി സല്‍മാനൊപ്പം...; ബോളിവുഡും കീഴടക്കാന്‍ നയന്‍താര

സല്‍മാന്‍ ഖാനും നയന്‍താരയും ഒരുമിക്കുന്നു. ജവാനിലൂടെ ബോളിവുഡില്‍ അരങ്ങേറിയ നയന്‍സിന്റെ പുതിയ ചിത്രം ആരാധകരില്‍ ആവേശമുണ്ടാക്കിയിരിക്കുകയാണ്. വംശി പെയ്ഡിപള്ളിയാണ് സിനിമയുടെ സംവിധാനം. ചിത്രത്തിന്റെ നിര്‍മാതാക്കളായ ശ്രീ വെങ്കടേശ്വര ക്രിയേഷന്‍സ് നയന്‍താരയെ ചിത്രത്തിലേക്ക് സ്വാഗതം ചെയ്തു കൊണ്ട് ട്വീറ്റ് ചെയ്തിട്ടുണ്ട്.

ദില്‍ രാജുവാണ് ചിത്രം നിര്‍മിക്കുന്നത്. ഏപ്രില്‍ മാസം തന്നെ സിനിമയുടെ ചിത്രീകരണം ആരംഭിക്കുമെന്നാണ് കരുതപ്പെടുന്നത്. തിങ്കളാഴ്ച സല്‍മാന്‍ ഖാനാണ് താനും വംശിയും ഒരുമിക്കുന്നതായി അറിയിക്കുന്നത്. കരിയറില്‍ തുടര്‍ പരാജയങ്ങളിലൂടെ കടന്നു പോകുന്ന സല്‍മാന്‍ ഖാന്‍ ശക്തമായി തിരികെ വരാനുള്ള ശ്രമത്തിലാണ്. ഇതിന്റെ ഭാഗമായാണ് തെന്നിന്ത്യന്‍ സംവിധായകനിലേക്ക് എത്തിയത്.

വംശിയും സല്‍മാന്‍ ഖാനും ഇതാദ്യമായാണ് കൈ കോര്‍ക്കുന്നത്. അതേസമയം വംശിയും ദില്‍ രാജുവും നേരത്തെ യേവഡു, വാരിസ് എന്ന് ചിത്രങ്ങള്‍ക്കായി കൈകോര്‍ത്തിരുന്നു. സല്‍മാന്‍ ഖാനും നയന്‍താരയും ഒരുമിക്കുന്നതോടെ ബോളിവുഡിലും തെന്നിന്ത്യയിലുമെല്ലാം ചിത്രം ചര്‍ച്ചയാകുമെന്ന കാര്യത്തില്‍ സംശയമില്ല. ജവാനില്‍ ഷാരൂഖ് ഖാനൊപ്പം കയ്യടി നേടിയ നയന്‍താര സല്‍മാനൊപ്പം ഒരുമിക്കുമ്പോള്‍ ആരാധകരും പ്രതീക്ഷയിലാണ്.

അതേസമയം മാതൃഭൂമിയാണ് സല്‍മാന്‍ ഖാന്റെ റിലീസ് കാത്തു നില്‍ക്കുന്നത്. നേരത്തെ ബാറ്റില്‍ ഓഫ് ഗല്‍വാന്‍ എന്നായിരുന്നു ഈ ചിത്രത്തിന്റെ പേര്. അപൂര്‍വ്വ ലഖിയയാണ് സിനിമയുടെ സംവിധാനം. സല്‍മാന്‍ ഖാനും ചിത്രാംഗദ സിങും ചേര്‍ന്നാണ് ചിത്രം നിര്‍മിക്കുന്നത്.