താരദമ്പതികളായ രശ്മിക മന്ദാനയും വിജയ് ദേവരകൊണ്ടയും പ്രധാന വേഷത്തിലെത്തുന്ന ചിത്രമാണ് 'രണബാലി'. ചിത്രത്തിന്റെ പ്രൊമോഷൻ പരിപാടികളിലാണിപ്പോൾ ഇരുവരും. ചിത്രത്തിന്റെ റിലീസിന് മുന്നോടിയായി 400 കുടുംബങ്ങളെ ദത്തെടുത്തിരിക്കുകയാണ് നടി. ഒരു വർഷത്തേക്ക് കുടുംബങ്ങൾക്ക് സൗജന്യമായി പലചരക്ക് സാധനങ്ങൾ നൽകുമെന്ന് നടി പ്രഖ്യാപിച്ചു.

മൂന്നു മാസം വീതമുള്ള ഘട്ടങ്ങളായാണ് നിത്യോപയോഗ സാധനങ്ങൾ എത്തിക്കുക. പ്രൊജക്ട് അന്നപൂർണ എന്ന പേരിലാണിത്. മറ്റുള്ളവർക്കും ചെറിയ രീതിയിലെങ്കിലും സഹായങ്ങൾ ചെയ്യാനുള്ള പ്രേരണയാകട്ടെ എന്ന് കരുതിയാണ് ഇക്കാര്യം വെളിപ്പെടുത്തിയതെന്ന് നടി വ്യക്തമാക്കി. 'രണബാലി'യിലെ ജയമ്മ എന്ന കഥാപാത്രത്തിന് തന്റെ യഥാർഥ വ്യക്തിത്വവുമായി ഏറെ സാമ്യമുണ്ടെന്നും രശ്മിക പറഞ്ഞു.

മറ്റുള്ളവരെ സഹായിക്കാനുള്ള മനസാണ് അതിലൊന്ന്. മുൻപ് ഇത്തരം സഹായങ്ങൾ ചെയ്യുമ്പോൾ സ്വകാര്യമായി സൂക്ഷിക്കുകയായിരുന്നു പതിവ്. എന്നാൽ ഇത്തരം പ്രവൃത്തികൾ മറ്റുള്ളവർക്ക് പ്രചോദനമാകുമെന്ന ചിന്തയിലാണ് ഇത്തവണ പരസ്യമാക്കാൻ തീരുമാനിച്ചതെന്ന് താരം വ്യക്തമാക്കി.

400 കുടുംബങ്ങൾക്കാണ് സഹായം ലഭിക്കുക. ഇതിലൂടെ പലചരക്ക് സാധനങ്ങൾക്കായി ചെലവഴിക്കേണ്ട തുക ലാഭിക്കാനും അത് കുടുംബങ്ങളുടെ മറ്റ് ഭാവി ആവശ്യങ്ങൾക്കായി ഉപയോഗിക്കാനും സാധിക്കുമെന്ന് കരുതുന്നതായി നടി പറഞ്ഞു. പലചരക്ക് സാധനങ്ങളുടെ പട്ടികയും താരം സോഷ്യൽ മീഡിയയിലൂടെ പങ്കുവെച്ചിട്ടുണ്ട്.

എല്ലാവരും തങ്ങളാലാകുന്ന രീതിയിൽ മറ്റുള്ളവരെ സഹായിക്കാൻ മുന്നോട്ടുവരണമെന്നും രശ്മിക അഭ്യർഥിച്ചു. "ചെറിയൊരു കാരുണ്യപ്രവൃത്തിക്ക് പോലും ഒരാളുടെ ജീവിതം മാറ്റാൻ സാധിക്കും. അത് വലുതായിരിക്കണമെന്ന് നിർബന്ധമില്ല, ചെറിയ രീതിയിലെങ്കിലും നമുക്ക് തുടങ്ങാം".- നടി കൂട്ടിച്ചേർത്തു. വിജയ് ദേവരകൊണ്ടയും രശ്മികയും ഒന്നിക്കുന്ന മൂന്നാമത്തെ ചിത്രമാണ് 'രണബാലി'. ഒക്ടോബർ 16ന് ചിത്രം തിയറ്ററുകളിലെത്തും.

കൂടുതല്‍ സിനിമ വാര്‍ത്തകള്‍ക്കായി വാട്സ്ആപ്പ് ഗ്രൂപ്പില്‍ അംഗമാകൂ

ഇവിടെ ക്ലിക്ക് ചെയ്യുക