യുഎഇയില്‍ അടുത്ത അഞ്ച് ദിവസം ചൂട് തുടരും; 48 ഡിഗ്രി വരെ താപനില ഉയരും

ദുബൈ: യുഎഇയില്‍ അടുത്ത അഞ്ച് ദിവസം ചൂട് തുടരുമെന്ന് കാലാവസ്ഥാ കേന്ദ്രം. രാജ്യത്തിന്റെ ഉള്‍പ്രദേശങ്ങളില്‍ 48 ഡിഗ്രി വരെ ഉയരും. മൂടല്‍ മഞ്ഞിനും നേരിയ മഞ്ഞിനും സാധ്യതയുണ്ടെന്നും കാലാവസ്ഥ നിരീക്ഷണ കേന്ദ്രം അധികൃതര്‍ അറിയിച്ചു. വെള്ളിയാഴ്ച വരെ ഭാഗികമായി മേഘാവൃതമായ കാലാവസ്ഥ തുടരും.

ഇന്ന് തെളിഞ്ഞതോ ഭാഗികമായി മേഘാവൃതമായതോ ആയ കാലാവസ്ഥയായിരിക്കും. കിഴക്കന്‍ മേഖലകളില്‍ മേഘങ്ങള്‍ രൂപപ്പെടുകയും ഉച്ചക്കുശേഷം ഇവ വലിയ മേഘങ്ങളായി മാറാനും സാധ്യതയുണ്ട്. രാത്രിയിലും ചൊവ്വാഴ്ച രാവിലെയും അന്തരീക്ഷത്തിലെ ഈര്‍പ്പം വര്‍ധിക്കും. ഇതോടെ തീരപ്രദേശങ്ങളിലും ഉള്‍പ്രദേശങ്ങളിലും ചിലയിടങ്ങളില്‍ മൂടല്‍മഞ്ഞിനും നേരിയ മഞ്ഞിനും സാധ്യതയുണ്ട്.

ഉള്‍പ്രദേശങ്ങളില്‍ 43 ഡിഗ്രി മുതല്‍ 48 ഡിഗ്രി വരെ താപനില ഉയര്‍ന്നേക്കും. തീരപ്രദേശങ്ങളിലും ദ്വീപുകളിലും 37 മുതല്‍ 42 ഡിഗ്രി വരെയും മലനിരകളില്‍ 29 ഡിഗ്രി മുതല്‍ 35 ഡിഗ്രി വരെയുമാണ് താപനില പ്രതീക്ഷിക്കുന്നത്. ചൊവ്വാഴ്ചയും തെളിഞ്ഞതോ ഭാഗികമായി മേഘാവൃതമായതോ ആയ കാലാവസ്ഥ തുടരും. കിഴക്കന്‍ മേഖലകളില്‍ ഉച്ചയോടെ കനത്ത മേഘങ്ങള്‍ രൂപപ്പെടാന്‍ സാധ്യതയുണ്ട്. ബുധനാഴ്ച കാറ്റിന്റെ വേഗം മണിക്കൂറില്‍ 35 കിലോമീറ്റര്‍ വരെ എത്തിയേക്കും.