ലഖ്‌നൗ: ഉത്തർപ്രദേശ് നിയമസഭാ തെരഞ്ഞെടുപ്പിൽ മത്സരിക്കാനുള്ള ആഗ്രഹം പരിഗണിച്ച്, കൊലപാതകക്കേസിൽ കുറ്റക്കാരനാണെന്ന് കണ്ടെത്തിയ പ്രതിയുടെ ശിക്ഷയും കുറ്റക്കാരനാണെന്ന് കണ്ടെത്തലും മരവിപ്പിച്ച് അലഹബാദ് ഹൈക്കോടതി. 2017-ൽ നടന്ന കൊലപാതകക്കേസിൽ 2025-ൽ ശിക്ഷിക്കപ്പെട്ട നന്ദ്‌ലാൽ റായ് എന്ന ബബ്ലു റായിയുടെ ക്രിമിനൽ അപ്പീലിലാണ് ജസ്റ്റിസ് സിദ്ധാർത്ഥ്, ജസ്റ്റിസ് വിനയ് കുമാർ ദ്വിവേദി എന്നിവരടങ്ങിയ ഡിവിഷൻ ബെഞ്ചിന്റെ അസാധാരണ ഉത്തരവ്. ശിക്ഷ മരവിപ്പിച്ചതിനൊപ്പം പ്രതിക്ക് കോടതി ജാമ്യവും അനുവദിച്ചു.

2027-ലെ യുപി തെരഞ്ഞെടുപ്പിൽ സ്വതന്ത്ര സ്ഥാനാർത്ഥിയായോ അല്ലെങ്കിൽ സാധ്യമെങ്കിൽ ബിജെപി ടിക്കറ്റിലോ മത്സരിക്കാൻ ആഗ്രഹിക്കുന്നുണ്ടെന്ന പ്രതിയുടെ വാദം പരിഗണിച്ചാണ് കോടതിയുടെ നടപടി. "ഒരു സാധാരണക്കാരന്റെ ഉപജീവനത്തിനുള്ള അവകാശം ഒരു രാഷ്ട്രീയക്കാരന്റെ തെരഞ്ഞെടുപ്പിൽ മത്സരിക്കാനുള്ള അവകാശത്തേക്കാൾ ഒട്ടും കുറവല്ല. അപ്പീലിൽ അന്തിമവിധി വരുന്നത് വരെ പ്രതിക്ക് നിലനിൽക്കാനും തെരഞ്ഞെടുപ്പിൽ മത്സരിക്കാനുമുള്ള അവസരം നഷ്ടപ്പെടാതിരിക്കാനും ശിക്ഷയും കുറ്റക്കാരനായി കണ്ടെത്തിയതും മരവിപ്പിക്കേണ്ടത് അനിവാര്യമാണ്," ഹൈക്കോടതി ഉത്തരവിൽ വ്യക്തമാക്കി. ശിക്ഷിക്കപ്പെടുന്നതിന് മുൻപ് ഇയാൾ ബിജെപിയുടെ സജീവ പ്രവർത്തകനും രാഷ്ട്രീയ രംഗത്ത് അറിയപ്പെടുന്ന വ്യക്തിയുമായിരുന്നുവെന്നും ബെഞ്ച് നിരീക്ഷിച്ചു.

2023-ലെ പ്രമാദമായ 'അഫ്സൽ അൻസാരി വേഴ്സസ് സ്റ്റേറ്റ് ഓഫ് യുപി' കേസിലെ സുപ്രീം കോടതി ഉത്തരവ് ഉദ്ധരിച്ചാണ് ഹൈക്കോടതി ഈ ഉത്തരവ് പുറപ്പെടുവിച്ചത്. ജനപ്രതിനിധികൾക്കും രാഷ്ട്രീയക്കാർക്കും അവരുടെ വോട്ടർമാരോടും പൊതുസമൂഹത്തോടും പ്രത്യേകമായ ഉത്തരവാദിത്തങ്ങളുണ്ടെന്നും, ശിക്ഷ മരവിപ്പിച്ചില്ലെങ്കിൽ തെരഞ്ഞെടുപ്പിൽ മത്സരിക്കാനുള്ള അവസരം എന്നെന്നേക്കുമായി നഷ്ടപ്പെടാൻ ഇടയാക്കുമെന്നുമുള്ള സുപ്രീം കോടതി നിരീക്ഷണം ബെഞ്ച് ചൂണ്ടിക്കാട്ടി. ക്രിമിനൽ നടപടിച്ചട്ടത്തിലെ സെക്ഷൻ 389(1) പ്രകാരം, തിരുത്താനാകാത്ത പ്രത്യാഘാതങ്ങൾ ഉണ്ടാകാനിടയുള്ള കേസുകളിൽ ശിക്ഷ മരവിപ്പിക്കാമെന്ന നിയമതത്വവും കോടതി ഇതിനായി അടിസ്ഥാനമാക്കി.

രാമജന്മഭൂമി പ്രസ്ഥാനത്തിന്റെ സജീവ പ്രവർത്തകനായിരുന്ന പ്രമോദ് കുമാർ നിഗം കൊല്ലപ്പെട്ട കേസിലാണ് നന്ദ്‌ലാൽ റായ്‌യെ വിചാരണ കോടതി ശിക്ഷിച്ചത്. ഗുണ്ടാത്തലവനും രാഷ്ട്രീയ നേതാവുമായിരുന്ന മുഖ്താർ അൻസാരിയുമായി മുൻപ് ബന്ധമുണ്ടായിരുന്ന റായ്, നിസ്സാര തർക്കത്തിന്റെ പേരിലാണ് പ്രമോദ് നിഗമിനെ കൊലപ്പെടുത്തിയതെന്നായിരുന്നു പ്രോസിക്യൂഷൻ ആരോപണം. എന്നാൽ സംഭവത്തിൽ രജിസ്റ്റർ ചെയ്ത പ്രാഥമിക അന്വേഷണ റിപ്പോർട്ടിൽ തന്റെ പേരുണ്ടായിരുന്നില്ലെന്നും, എഫ്ഐആർ ഇട്ട് 17 ദിവസങ്ങൾക്ക് ശേഷം വെറും സംശയങ്ങളുടെയും നിഗമനങ്ങളുടെയും അടിസ്ഥാനത്തിൽ രാഷ്ട്രീയമായി തന്നെ കേസിൽ കുടുക്കുകയായിരുന്നുവെന്നും പ്രതി ഹൈക്കോടതിയിൽ വാദിച്ചു. ഈ വാദങ്ങൾ പ്രഥമദൃഷ്ട്യാ പരിഗണിച്ചാണ് ഹൈക്കോടതി ശിക്ഷ മരവിപ്പിച്ച് ജാമ്യം അനുവദിച്ചത്.