ബിജെപി നേതാവ് 5 തവണ വാക്‌സിന്‍ എടുത്തു; ആറാം തവണ ഷെഡ്യൂള്‍ ചെയ്തു; പരാതി; അന്വേഷണത്തിന് ഉത്തരവ്‌

ലക്‌നൗ: അഞ്ച് തവണ കോവിഡ് വാക്സിൻ സ്വീകരിച്ചുവെന്ന് സർട്ടിഫിക്കറ്റിൽ രേഖപ്പെടത്തിയതിനെതിരെ പരാതിയുമായി ബിജെപി നേതാവ്. ആറാമത്തെ തവണ ഡോസിനായി ഷെഡ്യൂൾ ചെയ്തതായും പരാതിയിൽ പറയുന്നു. ഉത്തർപ്രദേശിലെ ബിജെപി പ്രാദേശിക നേതാവ് 73കാരനായ രാംപാൽ സിങ്ങാണ് പരാതിയുമായി രം​ഗത്ത് എത്തിയിരിക്കുന്നത്.

വാക്​സിൻ സർട്ടിഫിക്കറ്റിൽ തെറ്റായ രേഖകൾ കാണിച്ചിരിക്കുകയാണെന്നും ഇത്​ അധികൃതരുടെ അനാസ്​ഥയുമാണെന്നാണ്​ രാംപാലിന്‍റെ പരാതി. ബിജെപി പ്രദേശിക നേതാവും ഹിന്ദു യുവ വാഹിനി അംഗവുമാണ്​ രാംപാൽ. അതേസമയം, വാക്​സിൻ സർട്ടിഫിക്കറ്റിൽ തെറ്റുവന്നതിന്​​ പിന്നിൽ ഗൂഡാലോചനയാണെന്നും പോർട്ടൽ ഹാക്ക്​ ചെയ്​തതായി സംശയിക്കുന്നതായും അധികൃതർ പറയുന്നു.

കഴിഞ്ഞദിവസമാണ്​ പോർട്ടലിൽനിന്ന്​ രാംപാൽ കോവിഡ്​ വാക്​സിൻ സർട്ടിഫിക്കറ്റ്​ ഡൗൺലോഡ്​ ചെയ്​തത്​. സർട്ടിഫിക്കറ്റിൽ അഞ്ചുഡോസ്​ സ്വീകരിച്ചതായും ഒരു ഡോസ്​ വാക്​സിൻ 2021 ഡിസബറിനും 2022 ജനുവരിക്കും ഇടയിൽ ഷെഡ്യൂൾ ചെയ്​തതായും കാണിക്കുന്നു. രാംപാൽ ആദ്യ ഡോസ്​ വാക്​സിൻ മാർച്ച്​ 16നും രണ്ടാം ഡോസ്​ മേയ്​ എട്ടിനുമാണ്​ സ്വീകരിച്ചത്​. എന്നാൽ സർട്ടിക്കറ്റിൽ ആദ്യ ഡോസ്​ വാക്​സിൻ മാർച്ച്​ 16, രണ്ടാം ഡോസ്​ മേയ്​ എട്ട്​, മൂന്നാം ഡോസ്​ മേയ്​ 15, നാലും അഞ്ചും ഡോസ്​ സെപ്​റ്റംബർ 15ന്​ എന്നിങ്ങനെ സ്വീകരിച്ചതായി കാണിച്ചിട്ടുണ്ട്​.

വാക്​സിൻ ഡോസുകൾ രണ്ടിൽ കൂടുതൽ തവണ രജിസ്റ്റർ ചെയ്​ത ആദ്യ കേസാണിതെന്ന്​ ചീഫ്​ മെഡിക്കൽ ഓഫിസർ അഖിലേഷ്​ മോഹൻ പറഞ്ഞു. പ്രഥമദൃഷ്​ട്യാ സംഭവത്തിന്​ പിന്നിൽ​ ഗൗഡാലോചനയാണെന്നും പോർട്ടൽ ഹാക്ക്​ ചെയ്​തതായി സംശയിക്കുന്നതായും അദ്ദേഹം കൂട്ടിച്ചേർത്തു. സംഭവത്തിൽ ജില്ല ഇമ്യൂണൈസേഷൻ ഓഫിസറോട്​ അന്വേഷണം നടത്തി റിപ്പോർട്ട്​ സമർപ്പിക്കാൻ ഉത്തരവിട്ടു.