മുംബൈ: മഹാരാഷ്ട്രയില്‍ മുട്ടുവരെ നീളമുള്ള നെക്‌ലേസ് അണിഞ്ഞ സ്ത്രീയുടെ ദൃശ്യങ്ങള്‍ വൈറലാകുന്നു. ഭര്‍ത്താവാണ് ഒരു കിലോഗ്രാം തൂക്കമുള്ള നെക്‌ലേസ് സമ്മാനമായി നല്‍കിയത്. സ്വര്‍ണം കൊണ്ടാണ് ഇത് പണികഴിപ്പിച്ചതെന്നായിരുന്നു പ്രാഥമിക റിപ്പോര്‍ട്ടുകള്‍. എന്നാല്‍ കേവലം 38,000 രൂപ നല്‍കി വാങ്ങിയ ഇമിറ്റേഷന്‍ ഗോള്‍ഡാണ് ഇതെന്ന് പൊലീസ് കണ്ടെത്തി.

ഭിവണ്ടിയിലാണ് സംഭവം. മുട്ടു വരെ നീളമുള്ള നെക്‌ലേസ് അണിഞ്ഞ് നില്‍ക്കുന്ന സ്ത്രീയുടെ ദൃശ്യങ്ങള്‍ വൈറലായതോടെ, നിജസ്ഥിതി അറിയാന്‍ പൊലീസ് അന്വേഷണം നടത്തുകയായിരുന്നു. തുടര്‍ന്നാണ് ഇത് ഇമിറ്റേഷന്‍ ഗോള്‍ഡാണ് എന്ന് കണ്ടെത്തിയത്. ഇതുമായി ബന്ധപ്പെട്ട്  ഭര്‍ത്താവ് ബാലയെ പൊലീസ് ചോദ്യം ചെയ്തു. തുടര്‍ന്നാണ് ഭര്‍ത്താവ് സത്യം വെളിപ്പെടുത്തിയത്.

ജ്വല്ലറി കടയില്‍ നിന്ന് 38,000 രൂപ നല്‍കിയാണ് മാല വാങ്ങിയതെന്ന് ബാല പറഞ്ഞു. വീഡിയോ ശ്രദ്ധയില്‍പ്പെട്ട പൊലീസ് മുന്‍കരുതലിന്റെ ഭാഗമായാണ് സംഭവം അന്വേഷിക്കാന്‍ തീരുമാനിച്ചത്. കുറ്റവാളികള്‍ ഇത് അവസരമായി എടുക്കുമെന്ന നിഗമനത്തിലാണ് നിജസ്ഥിതി അന്വേഷിക്കാന്‍ തീരുമാനിച്ചത്. തുടര്‍ന്ന് സ്‌റ്റേഷനിലേക്ക് ബാലയെ വിളിപ്പിക്കുകയായിരുന്നു.