കൊച്ചി: കൊച്ചിയില്‍ ഇന്നലെ വൈകീട്ട് തുടങ്ങിയ മഴ ഇന്ന് രാവിലെ വരെ നീണ്ടുനിന്നു. തുലാവര്‍ഷത്തോടനുബന്ധിച്ചുളള കനത്തമഴയില്‍ കൊച്ചി നഗരത്തിന്റെ വിവിധ ഭാഗങ്ങളില്‍ വെളളക്കെട്ട് അനുഭവപ്പെട്ടു. റോഡ് ഗതാഗതം പൂര്‍ണമായി തടസ്സപ്പെട്ടിരിക്കുകയാണ്. റോഡില്‍ വെളളം കയറിയിരിക്കുന്നതിന്റെ ദൃശ്യങ്ങള്‍ വ്യാപകമായാണ് പ്രചരിക്കുന്നത്.

വിവിധ റോഡുകള്‍ വെളളത്തിനിടയിലായതോടെ, ജനജീവിതം ദുസ്സഹമായിരിക്കുകയാണ്. എംജി റോഡിലും ടിഡി റോഡിലും ദേശീയപാതയിലും വെളളം കയറി. ഉപതെരഞ്ഞെടുപ്പ് നടക്കുന്ന വേളയില്‍, പല ബൂത്തുകളിലും വെളളം കയറിയത് വോട്ടെടുപ്പിനെയും സാരമായി ബാധിച്ചിട്ടുണ്ട്. പല ബൂത്തുകളിലും വൈദ്യുതി സംവിധാനം തകരാറിലായിട്ടുണ്ട്. ഉച്ച കഴിഞ്ഞ് ഇടിമിന്നലോടെ മഴ വീണ്ടും ശക്തിപ്രാപിക്കുമെന്ന മുന്നറിയിപ്പ് നഗരവാസികളെ ആശങ്കപ്പെടുത്തുകയാണ്.