പനാജി: മലയാളി യുവതിയെ ഗോവയിൽ മരിച്ച നിലയിൽ കണ്ടെത്തി. തലശ്ശേരി ബ്രണ്ണൻ കോളജ് വിദ്യാർത്ഥിയായ അഞ്ജന ഹരീഷിനെ(21)യാണ് ഗോവയിൽ മരിച്ച നിലയിൽ കണ്ടെത്തിയതായി വിവരം ലഭിച്ചത്. തളിപ്പറമ്പ് സ്വദേശിനിയും കാസർകോട് താമസക്കാരിയുമായ മിനിയുടെ മകളാണ്.

അഞ്ജനയുടെ മരണം ആത്മഹത്യയാണെന്നാണ് സൂചന. സംഭവത്തെ തുടർന്ന് യുവതിയുടെ ബന്ധുക്കൾ ഗോവയിലേക്ക് യാത്ര തിരിച്ചതായും ഇവർക്ക് പാസ് അനുവദിച്ചതായും ഹോസ്ദുർഗ് പൊലീസ് പറഞ്ഞു.

അഞ്ജന ഹരീഷിനെ കാണാനില്ലെന്ന് വീട്ടുകാർ നേരത്തെ പൊലീസിൽ പരാതി നൽകിയിരുന്നു. തുടർന്ന് അഞ്ജന പൊലീസിന് മുന്നിൽ ഹാജരാകുകയും സ്വന്തം ഇഷ്ടപ്രകാരം സുഹൃത്തുക്കളോടൊപ്പം പോകുകയുമായിരുന്നു. 

ഇതിനു ശേഷമാണ് അഞ്ജനയും സുഹൃത്തുക്കളും ഗോവയിലേക്ക് പോയതെന്നാണ് വിവരം. കേരളത്തിലെ സ്വവർഗാനുരാഗ, ട്രാൻസ്ജെൻഡർ സംഘടനകളിലും അവരുമായി ബന്ധപ്പെട്ട പ്രവർത്തനങ്ങളിലും സജീവമായിരുന്നു അഞ്ജന.