സിജെപി നേതാക്കൾക്ക് ജാമ്യം, സിഎംആർഎൽ കേസിൽ പിണറായിക്ക് ആശ്വാസം, കോൺ​ഗ്രസിനെ വെട്ടിലാക്കി കെ സുധാകരൻ; ഇന്നത്തെ 5 പ്രധാന വാർത്തകൾ

ന്യായമില്ലാതെ കെപിസിസി പ്രസിഡന്റ് പദവിയില്‍ നിന്നും മാറ്റിയതില്‍ ദുഃഖമുണ്ടെന്ന് കെ സുധാകരൻ എംപി. സിജെപി നേതാക്കളായ അശുതോഷ് റങ്ക, സൗരവ് ദാസ് എന്നിവർക്ക് കോടതി ജാമ്യം അനുവദിച്ചു. സിഎംആർഎൽ കേസിൽ പിണറായിക്ക് ആശ്വാസം. വിജിലൻസ് അന്വേഷണം സുപ്രീംകോടതി സ്റ്റേ ചെയ്തു. ഇന്നത്തെ 5 പ്രധാന വാർത്തകൾ ( Top 5 News Today ) അറിയാം.

സിഎംആർഎൽ–എക്സാലോജിക് മാസപ്പടി ഇടപാടുമായി ബന്ധപ്പെട്ട് മുൻ മുഖ്യമന്ത്രി പിണറായി വിജയൻ, മകൾ ടി. വീണ, പി.എ. മുഹമ്മദ് റിയാസ് എന്നിവർക്ക് കേരള ഹൈക്കോടതി ഡിവിഷൻ ബെഞ്ചിൽ അപ്പീൽ ഫയൽ ചെയ്യാൻ അർഹതയുണ്ടെന്ന് സുപ്രീം കോടതി. ഹർജിക്കാർക്ക് അപ്പീൽ അവകാശമില്ലെന്ന് ചൂണ്ടിക്കാട്ടി ഹർജി തള്ളിയ ഹൈക്കോടതി ഡിവിഷൻ ബെഞ്ചിന്റെ ഉത്തരവ് സുപ്രീം കോടതി റദ്ദാക്കി. വിജിലൻസ് തുടരന്വേഷണം സ്റ്റേ ചെയ്തു. 

ന്യായമില്ലാതെ കെപിസിസി പ്രസിഡന്റ് പദവിയില്‍ നിന്നും മാറ്റിയതില്‍ ദുഃഖമുണ്ടെന്ന് കെ സുധാകരൻ എംപി. അടിപതറി തകര്‍ന്ന് തരിപ്പണമായി നിന്ന കോണ്‍ഗ്രസ് പ്രസ്ഥാനത്തെ, താന്‍ കെപിസിസി പ്രസിഡന്റായി ചുമതലയേറ്റശേഷം കരകയറ്റാന്‍ ശ്രമിച്ചു. അന്നത്തെ ദുഷ്‌കരമായ ചുറ്റുപാടില്‍ നിന്നും കോണ്‍ഗ്രസിനെ വിജയങ്ങളുടെ പാതയിലേക്ക് നയിച്ചതും, തെരഞ്ഞെടുപ്പില്‍ വന്‍ വിജയങ്ങള്‍ വെട്ടിത്തുറന്നതും ചരിത്രമാണെന്ന് കെ സുധാകരന്‍ പറയുന്നു.

സിജെപി നേതാക്കളായ സൗരവ് ദാസ്, ആശുതോഷ് റങ്ക എന്നിവര്‍ക്ക് ജാമ്യം അനുവദിച്ചു. സ്‌പെഷ്യല്‍ എക്‌സിക്യൂട്ടീവ് മജിസ്ട്രേറ്റ് ഉപാധികളോടെയാണ് ഇവര്‍ക്ക് ജാമ്യം അനുവദിച്ചത്. മറ്റു കേസുകളില്‍ കസ്റ്റഡി ഇല്ലെങ്കില്‍ ഇരുവരെയും ജയിലില്‍ നിന്നും വിട്ടയക്കാന്‍ കോടതി ഉത്തരവിട്ടു. എട്ടു ദിവസത്തെ ജുഡീഷ്യല്‍ കസ്റ്റഡിക്ക് ശേഷമാണ് ഇരു നേതാക്കള്‍ക്കും ജാമ്യം ലഭിക്കുന്നത്. 

മുഖ്യമന്ത്രി വി ഡി സതീശന് രാഷ്ട്രീയ പക്വതയില്ലെന്ന് ബിജെപി ഉപാധ്യക്ഷനും മുന്‍ പിഎസ്‌സി ചെയര്‍മാനുമായ ഡോ. കെ എസ് രാധാകൃഷ്ണന്‍. ഉമ്മന്‍ചാണ്ടിക്ക് എല്‍ഡിഎഫ് കൊടുക്കാത്ത സംരക്ഷണമാണ് പിണറായി വിജയന് യുഡിഎഫ് നല്‍കുന്നത്. ഇതിന് പിന്നില്‍ രാഹുല്‍ ഗാന്ധിയാണ്. പിണറായിയുടെ കുടുംബവും രാഹുല്‍ഗാന്ധിയുടെ കുടുംബവും അഴിമതി കേസില്‍ കുറ്റക്കാരാണ്. രണ്ട് കുടുംബവും യോജിപ്പിലാണ്. പ്രതിപക്ഷ നേതൃസ്ഥാനത്തു നിന്ന് മാറണം എന്ന് പിണറായിയോട് പറയാന്‍ യുഡിഎഫില്‍ ആരുമില്ലാതായെന്നും കെ എസ് രാധാകൃഷ്ണൻ പറഞ്ഞു.

രഞ്ജി ട്രോഫിയില്‍ ഒഡിഷയ്‌ക്കെതിരെ കേരളത്തിന് ഇന്നിങ്‌സ് വിജയം. നാലാം ദിനം നാലിന് 102 എന്ന നിലയില്‍ ബാറ്റിങ് പുനരാരംഭിച്ച ഒഡിഷയ്ക്ക് 41 റണ്‍സ് മാത്രമാണ് കൂട്ടിച്ചേര്‍ക്കാനായത്. അഞ്ച് വിക്കറ്റ് പിഴുത ജലജ് സക്‌സേനയാണ് കേരളത്തിന്റെ ബൗളിങ് ആക്രമണത്തിന് നേതൃത്വം നല്‍കിയത്. ഇന്നിങ്‌സിനും 36 റണ്‍സിനുമാണ് കേരളത്തിന്റെ ജയം.