പാലക്കാട് വീട്ടിൽ പൊട്ടിത്തെറി; 2 പേർക്ക് പരിക്ക്; പന്നിപ്പടക്കമെന്ന് പൊലീസ്

പാലക്കാട്: വീട്ടിലുണ്ടായ പൊട്ടിത്തെറിയിൽ സഹോദരങ്ങൾക്കു പരിക്ക്. പുതുന​ഗരത്താണ് പൊട്ടിത്തെറിയുണ്ടായത്. മാങ്ങോട് ലക്ഷംവീട് ന​ഗറിലെ ഷെരീഫ്, സഹോദരി ഷഹാന എന്നിവർക്കാണ് പരിക്കേറ്റത്. ഇവരെ ആശുപത്രിയിൽ പ്രവേശിപ്പിച്ചു. വ്യാഴാഴ്ച ഉച്ചയോടെയാണ് സംഭവം. വീട്ടിലെ ​ഗ്യാസ് സിലിൻഡർ പൊട്ടിത്തെറിച്ച് അപകടമുണ്ടായി എന്നായിരുന്നു പൊലീസിന്റെ പ്രാഥമിക നി​ഗമനം.

എന്നാൽ പൊട്ടിത്തെറിച്ചത് പന്നിപ്പടക്കമാണെന്നു വീട്ടിൽ പൊലീസ് നടത്തിയ പ്രാഥമിക പരിശോധനയിൽ വ്യക്തമായി. പരിശോധനയിൽ മറ്റ് സ്ഫോടക വസ്തുക്കളൊന്നും കണ്ടെത്തിയില്ലെന്നു പൊലീസ് വ്യക്തമാക്കി. ഷെരീഫ് പന്നിപ്പടക്കം ഉപയോ​ഗിച്ച് പന്നികളെ പിടികൂടാറുണ്ടെന്നും പൊലീസ് പറഞ്ഞു.

അതിനിടെ പൊട്ടിത്തെറിയുമായി ബന്ധപ്പെട്ട് ആരോപണവുമായി ബിജെപി രം​ഗത്തെത്തി. വീട്ടിനുള്ളിൽ പൊട്ടിത്തെറിച്ചത് ബോംബാണെന്നും പിന്നിൽ എസ്ഡിപിഐ ആണെന്നും ബിജെപി ആരോപിച്ചു. ഷെരീഫ് ഉൾപ്പെടെ വീട്ടുകാർ എല്ലാവരും എസ്ഡിപിഐ പ്രവർത്തകരാണെന്നും അവർ അരോപിച്ചു.

എന്നാൽ ഷെരീഫ് ഉൾപ്പെടെയുള്ള 12 പേരെ രണ്ട് വർഷം മുൻപ് പാർട്ടിയിൽ നിന്നു പുറത്താക്കി എന്നാണ് എസ്ഡിപിഐ വിശദീകരിക്കുന്നത്.