കാര്‍ മതിലില്‍ ഇടിച്ചു തീപിടിച്ചു; വയോധികന് ദാരുണാന്ത്യം

കോഴിക്കോട്: കോഴിക്കോട് കാര്‍ മതിലിലിടിച്ച് തീപിടിച്ച് യാത്രികന് ദാരുണാന്ത്യം. ചേവായൂര്‍ സ്വദേശിയും വാഹന-വസ്തു ഇടപാട് വ്യാപാരിയുമായ സിപി സുധാകരന്‍ ആണ് മരിച്ചത്. ഇന്ന് പുലര്‍ച്ചെ നാലുമണിയോടെയായിരുന്നു അപകടം നടന്നത്.

ബിസിനസ് ആവശ്യങ്ങള്‍ക്കായി വീട്ടില്‍ നിന്നും കൊയിലാണ്ടിയിലേക്ക് തിരിക്കവേ വീടിനടുത്ത് വെച്ചാണ് അപകടമുണ്ടായത്. കാറുമായി പുറത്തേക്കിറങ്ങുമ്പോള്‍ നിയന്ത്രണം നഷ്ടമായി മതിലില്‍ ഇടിക്കുകയായിരുന്നു. തുടര്‍ന്ന് കാറിന് തീപിടിച്ചു. പുറത്തിറങ്ങാന്‍ കഴിയാതെ സുധാകരന്‍ കാറിനുള്ളില്‍ കുടുങ്ങി പോവുകയായിരുന്നു.

അപകടം നടന്ന സ്ഥലത്ത് വലിയൊരു ഇറക്കമുണ്ട്. ഈ ഇറക്കം ഇറങ്ങി വരുന്നതിനിടയില്‍ സുധാകരന്‍ ഓടിച്ചിരുന്ന വാഹനത്തിന്റെ നിയന്ത്രണം നഷ്ടപ്പെടുകയായിരുന്നു. നിയന്ത്രണം വിട്ട കാര്‍ ആദ്യം റോഡരികിലെ ട്രാന്‍സ്‌ഫോര്‍മറിനോട് ചേര്‍ന്ന ഭാഗത്ത് ഇടിക്കുകയും, തുടര്‍ന്ന് വലിയ ആഘാതത്തോടെ മതിലിലേക്ക് ഇടിച്ചു കയറുകയുമായിരുന്നു. ഇടിയുടെ ആഘാതത്തില്‍ കാറിന് തീപിടിച്ചു. കാറിന് തീപിടിക്കുന്നത് ശ്രദ്ധയില്‍പ്പെട്ട നാട്ടുകാരാണ് അഗ്‌നിരക്ഷാ സേനയെ വിവരം അറിയിച്ചത്.

നാട്ടുകാര്‍ ഓടിയെത്തുമ്പോള്‍ കാര്‍ പൂര്‍ണമായും അഗ്‌നിക്കിരയായിക്കൊണ്ടിരിക്കുകയായിരുന്നു. ഏകദേശം പതിനഞ്ച് മിനിറ്റോളം വാഹനം ആളിക്കത്തി. അഗ്‌നിരക്ഷാസേനയെത്തി തീയണച്ചപ്പോഴേക്കും സുധാകരന്‍ മരിച്ചു. പൊലീസ് സ്ഥലത്തെത്തി മേല്‍ നടപടികള്‍ സ്വീകരിച്ചു.