തിരുവനന്തപുരം: സിപിഎമ്മിലെ പ്രായപരിധി മാനദണ്ഡത്തെ പരിഹസിച്ച് ജി സുധാകരൻ എംഎൽഎ. നിയമസഭയിൽ മുതിർന്ന പൗരരുടെ അവകാശസംരക്ഷണ ബില്ലിന്റെ ചർച്ചാവേളയിലായിരുന്നു ജി സുധാകരന്റെ പരാമർശം.

‘‘പാർട്ടികളിൽ പ്രായപരിധി വെക്കുന്നത് അസംബന്ധമാണ്. ബുദ്ധിയില്ലായ്മയാണ്. ചരിത്രനിരാസമാണ്. അത് വെച്ചവരെല്ലാം അനുഭവിക്കും സാർ... അനുഭവിച്ചുകൊണ്ടിരിക്കുകയാണ് സാർ...’’ സുധാകരൻ പറഞ്ഞു.

‘‘75 ആയെന്നു പറഞ്ഞ് എന്നേയും മാറ്റിയതാണ്. എനിക്ക് 75 ആയിട്ടില്ല. മൂന്നര വയസ്സായപ്പോൾ അക്ഷരമെല്ലാം പഠിച്ചതുകൊണ്ട് ആറുവയസ്സെന്ന് കാണിച്ച് പള്ളിക്കൂടത്തിലാക്കിയതാണ്. പ്രായം തികയുന്നതുവരെ തുടരണമെന്ന് എനിക്ക് ആഗ്രഹമില്ലായിരുന്നു. ഞാനിപ്പോൾ സ്വതന്ത്രനാണ്. അതിനാൽ പ്രായപരിധിയുടെ രക്തസാക്ഷിയല്ല, നല്ലൊരു അനുഭവസാക്ഷിയാണ്’’ -സുധാകരൻ പറഞ്ഞു.

സിപിഎമ്മിലും കോൺഗ്രസിലും ബിജെപിയിലുമെല്ലാം മുതിർന്ന പൗരന്മാരെ പ്രായപരിധിയുടെ പേരിൽ ഒഴിവാക്കുന്നത് ശരിയാണോയെന്ന് കോൺ​ഗ്രസിലെ എം വിൻസെന്റാണ് സുധാകരനോട് ചോദിച്ചത്.