മലപ്പുറം: കളിക്കുന്നതിനിടെ കഴുത്തില്‍ 12 വയസ്സുകാരന്റെ ബെല്‍റ്റ് കുടുങ്ങി. പന്തല്ലൂര്‍ കിഴക്കുംപറമ്പ് സ്വദേശിയായ ഫൈസലിന്റെ കഴുത്തിലാണ് ബെല്‍റ്റ് കുടുങ്ങിയത്. ജില്ല ട്രോമാകെയര്‍ പാണ്ടിക്കാട് സ്‌റ്റേഷന്‍ യൂനിറ്റ് വളന്റിയര്‍മാര്‍ ഇടപെട്ട് കുട്ടിയെ അപകടത്തില്‍ നിന്നും രക്ഷപ്പെടുത്തി. കഴിഞ്ഞദിവസം രാത്രിയാണ് സംഭവം.

കളിക്കുന്നതിനിടെ അബദ്ധത്തില്‍ കഴുത്തില്‍ പ്ലാസ്റ്റിക് ബെല്‍ട്ട് ഇടുകയും ഇത് കുരുങ്ങുകയുമായിരുന്നു. ബെല്‍റ്റ് മുറിച്ചുമാറ്റാന്‍ വീട്ടുകാരും അയല്‍വാസികളും ഇടപെട്ട് ശ്രമിച്ചെങ്കിലും പരാജയപ്പെട്ടു. അസഹ്യമായ വേദനയും ശ്വാസതടസ്സവും അനുഭവപ്പെടുകയായിരുന്നു.

ഇതോടെ, പാണ്ടിക്കാട് ട്രോമാകെയര്‍ യൂണിറ്റിന്റെ സഹായം തേടുകയായിരുന്നു. ഏറെനേരത്തെ പരിശ്രമത്തിനൊടുവില്‍ ആണ് ടീം ലീഡര്‍ മുജീബിന്റെ നേതൃത്വത്തില്‍ ട്രോമാകെയര്‍ യൂണിറ്റ് പ്രവര്‍ത്തകര്‍ ബെല്‍റ്റ് മുറിച്ചു മാറ്റിയത്. സക്കീര്‍ കാരായ, ഹനീഫ കിഴക്കുംപറമ്പ്, ബഷീര്‍ മൂര്‍ഖന്‍ എന്നിവര്‍ രക്ഷാദൗത്യത്തില്‍ പങ്കാളികളായി.