ഹമാസ് സൈനിക മേധാവിയെ കൊലപ്പെടുത്തി; സ്ഥിരീകരിച്ച് ഇസ്രയേല്‍

ജറുസലേം: ഹമാസിന്റെ സൈനിക തലവനും ഒക്ടോബര്‍ ഏഴിലെ ആക്രമണത്തിന്റെ സൂത്രധാരനുമായ മുഹമ്മദ് ദെയ്ഫിനെ വധിച്ചെന്ന് ഇസ്രയേലിന്റെ സ്ഥിരീകരണം. ജൂലൈയില്‍ ഗാസയില്‍ നടത്തിയ വ്യോമാക്രമണത്തിലാണു ദെയ്ഫ് കൊല്ലപ്പെട്ടതെന്ന് ഇസ്രയേല്‍ അറിയിച്ചു. ജൂലൈ 13 ന് തെക്കന്‍ ഗാസ നഗരമായ ഖാന്‍ യൂനിസിന്റെ പ്രാന്തപ്രദേശത്തുണ്ടായ ആക്രമണത്തിലാണു ദെയ്ഫിനെ വധിച്ചതെന്ന് ഇസ്രയേല്‍ സൈന്യമായ ഐഡിഎഫ് (ഇസ്രയേലി ഡിഫന്‍സ് ഫോഴ്‌സ്) അറിയിച്ചു. ഹമാസ് രാഷ്ട്രീയകാര്യ മേധാവി ഇസ്മായില്‍ ഹനിയ കഴിഞ്ഞദിവസം ഇറാനില്‍വെച്ച് കൊല്ലപ്പെട്ടിരുന്നു. ഇതിനുപിന്നാലെയാണ് ഹമാസിന്റെ സൈനികമേധാവിയെ തങ്ങള്‍ വധിച്ചെന്ന് ഇസ്രയേല്‍ സൈന്യം അവകാശപ്പെട്ടത്.

ഒക്ടോബര്‍ ഏഴിലെ ആക്രമണം ആസൂത്രണംചെയ്തതും നടപ്പാക്കിയതും ദെയ്ഫിന്റെ നേതൃത്വത്തിലാണെന്നും ഇസ്രയേല്‍ സൈന്യം പ്രസ്താവനയിലൂടെ പറഞ്ഞു. ടെഹ്റാനില്‍ ഹനിയയുടെ അന്ത്യകര്‍മങ്ങള്‍ പുരോഗമിക്കുന്നതിനിടെയാണ് മറ്റൊരു ഹമാസ് നേതാവ് കൂടി കൊല്ലപ്പെട്ടെന്ന വിവരം പുറത്തുവരുന്നത്.

വാര്‍ത്തകള്‍ അപ്പപ്പോള്‍ ലഭിക്കാന്‍ സമകാലിക മലയാളം ആപ് ഡൗണ്‍ലോഡ് ചെയ്യുക ഏറ്റവും പുതിയ വാര്‍ത്തകള്‍

ഹമാസിന്റെ ഏറ്റവും പ്രമുഖ നേതാക്കളിലൊരാളായ മുഹമ്മദ് ദെയ്ഫ് ഇസ്രയേലിന്റെ കൊടുംകുറ്റവാളികളുടെ പട്ടികയിലെ പ്രധാനിയാണ്. ബോംബ് നിര്‍മാണത്തിലെ വൈദഗ്ധ്യത്തിലൂടെയും ടണല്‍ശൃംഖലകള്‍ വിപുലപ്പെടുത്തുന്നതിലൂടെയും മുഹമ്മദ് ദെയ്ഫ് ഹമാസ് നേതൃത്വത്തില്‍ ശ്രദ്ധനേടി. ഇസ്രയേലിനെതിരേ നിരവധി ചാവേര്‍ ആക്രമണങ്ങളടക്കം ആസൂത്രണംചെയ്ത് നടപ്പാക്കിയതും ദെയ്ഫായിരുന്നു.