ഇറാൻ ‘കോഡ് 100’ പ്രഖ്യാപിച്ചു? പരിപാടികൾ വെട്ടിച്ചുരുക്കി ട്രംപ് വൈറ്റ് ഹൗസിൽ എത്തി; പശ്ചിമേഷ്യയിൽ ആശങ്ക

ടെഹ്‌റാൻ: പശ്ചിമേഷ്യയിൽ സംഘർഷസാധ്യത നിലനിൽക്കെ ഇറാൻ ‘കോഡ് 100’ പ്രഖ്യാപിച്ചതായി റിപ്പോർട്ട്. രാജ്യത്തെ സൈന്യത്തോട് തയാറായിരിക്കാൻ നൽകുന്ന ഏറ്റവും ഗൗരവമേറിയ മുന്നറിയിപ്പാണിത്. എന്നാൽ, ഇറാൻ ഔദ്യോഗിക വാർത്താ ഏജൻസികളോ സർക്കാർ മാധ്യമങ്ങളോ ഇക്കാര്യം സ്ഥിരീകരിച്ചിട്ടില്ല. 

ഇറാൻ സൈന്യത്തിന് ജാഗ്രത നിർദേശം നൽകിയെന്ന റിപ്പോർട്ടുകൾക്ക് പിന്നാലെ യുഎസ് പ്രസിഡന്റ് ഡോണൾഡ് ട്രംപ് വിവിധ പരിപാടികൾ വെട്ടിച്ചുരുക്കി വൈറ്റ് ഹൗസിൽ തിരിച്ചെത്തിയിട്ടുണ്ട്. എന്നാൽ ട്രംപിന്റെ മടക്കയാത്രയ്ക്ക് ഏതെങ്കിലും പ്രത്യേക സൈനിക നടപടിയുമായി ബന്ധമുണ്ടോയെന്ന് വ്യക്തമാക്കാൻ വൈറ്റ് ഹൗസ് തയ്യാറായിട്ടില്ല. ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹുവും അമേരിക്കൻ സന്ദർശനം വെട്ടിച്ചുരുക്കി ഇസ്രയേലിലേക്ക് മടങ്ങിയതായി റിപ്പോർട്ടുകളുണ്ട്.

എന്താണ് ഇറാന്റെ ‘കോഡ് 100’?

സൈന്യത്തോട് ഏത് സാഹചര്യത്തിലും നേരിടാൻ തയാറായിരിക്കണമെന്ന് നിർദേശിക്കുന്ന ഇറാന്റെ ഏറ്റവും ഉയർന്ന തലത്തിലുള്ള സൈനിക ജാഗ്രതാ സംവിധാനമാണ് ‘കോഡ് 100’. ഇസ്‌ലാമിക് റവല്യൂഷനറി ഗാർഡ് കോർപ്സ് (IRGC), ഇറാൻ സൈന്യം, മറ്റ് അർധസൈനിക വിഭാഗങ്ങൾ എന്നിവയെ പരമാവധി സന്നദ്ധരാക്കുന്നതാണ് ഈ നിർദേശം.

കോഡ് 100 നിലവിൽ വന്നാൽ സാധ്യതയുള്ള ആക്രമണങ്ങളെ നേരിടാനും ആവശ്യമായ തിരിച്ചടി നൽകാനും സൈന്യം ഏത് സമയത്തും സജ്ജമായിരിക്കേണ്ടി വരും. ഇതിന്റെ ഭാഗമായി സൈനികരെ അടിയന്തര വിന്യാസത്തിന് തയാറാക്കുക, സൈനിക ആശയവിനിമയം ശക്തമാക്കുക, ആക്രമണമുണ്ടായാൽ വേഗത്തിൽ പ്രതികരിക്കാനുള്ള നടപടികൾ സ്വീകരിക്കുക തുടങ്ങിയ മുന്നൊരുക്കങ്ങൾ സ്വീകരിച്ചേക്കുമെന്നാണ് റിപ്പോർട്ട്.