ഒമാനിൽ മൈനകളെയും കാക്കകളെയും കൂട്ടത്തോടെ കൊന്നൊടുക്കി; കാരണമിതാണ്

മസ്കത്ത്: രാ​ജ്യ​ത്തെ കാർഷിക മേഖലയ്ക്ക് വെല്ലുവിളിയാകുന്ന പ​ക്ഷി​ക​ളെ നി​യ​ന്ത്രി​ക്കു​ന്ന​തി​ന്‍റെ ഭാ​ഗ​മാ​യി നടത്തി വന്ന ക്യാ​മ്പ​യി​ൻ വിജയകരമെന്ന് ഒമാൻ സർക്കാർ. വിളകൾ നശിപ്പിക്കാൻ എത്തുന്ന പക്ഷികളെ തുരത്തണമെന്ന ആവശ്യം കർഷകർ ഉന്നയിച്ച സാഹചര്യത്തിലാണ് സർക്കാർ നടപടികളുമായി രംഗത്ത് എത്തിയത്. കൂടുതൽ കാർഷിക മേഖലകളുള്ള ദോ​ഫാ​റി​ൽ അടക്കം പ​ക്ഷി​ക​ളെ നി​യ​ന്ത്രി​ക്കു​ന്ന​ത്തിൽ വിജയം കണ്ടെന്ന് അധികൃതർ അറിയിച്ചു.

ദോ​ഫാ​റി​ൽ​ നി​ന്ന് ഇ​ല്ലാ​താ​ക്കി​യ​ത് 1,61,410 പ​ക്ഷി​ക​ളെ​യെ​ന്ന് പ​രി​സ്ഥി​തി അ​തോ​റി​റ്റി വ്യക്തമാക്കി. 2022മു​ത​ൽ ആ​​രം​ഭി​ച്ച ക്യാ​മ്പ​​യി​ന്റെ ഭാ​ഗ​മാ​യി 88,365 മൈ​ന​ക​ളെയും 73,046 കാ​ക്ക​ക​ളെയും ഇല്ലാതാക്കി. ഈ ​വ​ർ​ഷം ജൂ​ൺ അ​വ​സാ​ന​ത്തോ​ടെ 10,449 പക്ഷികളെയാണ് ഫീ​ൽ​ഡ് ടീ​മു​ക​ൾ നശിപ്പിച്ചത്.

ക്യാ​മ്പ​യി​ൻ ദോ​ഫാ​റി​ലാ​ണ്​ ആരംഭിച്ചതെങ്കിലും പി​ന്നീ​ട് മ​സ്‌​ക​ത്ത്, വ​ട​ക്ക​ൻ ബാ​ത്തി​ന എ​ന്നി​വ​യു​ൾ​പ്പെ​ടെ​യു​ള്ള മ​റ്റ് പ്രദേശങ്ങളിലും ഇത് വ്യാപകമാക്കി. പ​ക്ഷി​ക​ൾ കൂ​ടു​ത​ലു​ള്ള സ്ഥ​ല​ങ്ങ​ൾ നീരീക്ഷിച്ച ശേഷം കെ​ണി​വ​ച്ച്​ പിടിച്ച ശേഷം എ​യ​ർ​ഗ​ൺ ഉ​പ​യോ​ഗി​ച്ച് നശിപ്പിക്കുന്ന രീതിയാണ് തുടർന്ന് വരുന്നത്.

ഒമാനിലെ കൃഷികൾ ഗോ​ത​മ്പ്, നെ​ല്ല് , മു​ന്തി​രി, ആ​പ്രി​ക്കോ​ട്ട്, പി​യേ​ഴ്സ് തു​ട​ങ്ങി​യവയാണ്. ഈ വിളകൾ വൻ തോതിൽ കാക്കയും,മൈ​ന​യും ഉൾപ്പെടയുള്ള പക്ഷികൾ നശിപ്പിക്കാൻ ആരംഭിച്ചതോടെയാണ് ഇവയുടെ എണ്ണം കുറക്കാനും വ്യാ​പ​നം നി​യ​ന്ത്രി​ക്കു​ന്ന​തി​നെ​പ്പ​റ്റിയും ​ ഉ​ദ്യോ​ഗ​സ്ഥ​തലത്തിൽ ചർച്ചകൾ ആരംഭിച്ചത്.

ഇതിനെത്തുടർന്ന് പ​ക്ഷി​ക​ളു​ടെ വ്യാ​പ​നം ത​ട​യുന്നതിൽ അ​ന്താ​രാ​ഷ്ട്ര വി​ദ​ഗ്ധ​യാ​യ സൂ​സ​ന സാ​വേ​ദ്ര​യുടെ സഹായത്തോടെയാണ് പക്ഷികളെ നശിപ്പിച്ചത്. ഒ​മാ​നി​ൽ 1,60,000ൽ ​അ​ധി​കം മൈ​ന​ക​ളു​ണ്ടെ​ന്നാ​ണ് ക​ണ​ക്കാ​ക്കു​ന്ന​ത്. ഇ​വ​യു​ടെ വ്യാ​പ​നം നി​യ​ന്ത്രി​ക്കാ​ൻ പ​രി​സ്ഥി​തി അ​തോ​റി​റ്റി രൂപീകരിച്ച പ്രത്യേക ടീമിന്റെ നേതൃത്വത്തിലാണ് പക്ഷി നശീകരണം തുടരുന്നത്.