അത് അവിടെ കിടന്നു - ഗൗതം ജിനീഷ് എഴുതിയ കവിത

അത് അവിടെ കിടന്നു

അമ്മ വിരലുകള്‍ക്കിടയില്‍

എന്തോ തിരുമ്മുന്നുണ്ടായിരുന്നു,

ചാരമാവാത്ത ഒരു കഷ്ണം പുകയിലയോ

അതോ വെറുമൊരു മണ്ണോ.

അങ്ങോട്ട് നോക്കരുത് എന്ന് മാത്രം പറഞ്ഞു.

മുറ്റത്ത്

ചിലര്‍ കുട നിവര്‍ത്തുന്നുണ്ടായിരുന്നു.

മഴ പെയ്യുന്നുണ്ടായിരുന്നില്ല,

എങ്കിലും അവര്‍ കുട നിവര്‍ത്തി.

ആ വരികള്‍ എനിക്ക് ഓര്‍മ്മയില്ല.

അവര്‍ വേഗത്തില്‍ വായിച്ചു തീര്‍ത്തത്

അയാളുടെ പേരായിരുന്നോ

അതോ റേഷന്‍ കാര്‍ഡിലെ നമ്പറുകളോ?

എനിക്ക് വലിയ തക്കാളികള്‍ കാണണമായിരുന്നു.

അമ്മ പറഞ്ഞ ആ വണ്ടിയില്‍

അയാള്‍ കയറിപ്പോയെങ്കില്‍,

അതില്‍ തക്കാളികള്‍ ഉണ്ടായിരുന്നിരിക്കണം.

ചെരിപ്പുകള്‍

പിന്നെയും അവിടെത്തന്നെ കിടന്നു.

അതില്‍ ഒരെണ്ണത്തിന്റെ വള്ളി

പൊട്ടിയിട്ടുണ്ടായിരുന്നു.

അത് മാറ്റിവെക്കാന്‍ ആരും നോക്കിയില്ല.

ഉപ്പ് കയ്പ്പ് തിന്നുന്നു.

നാവ് വരളുന്നു.

അത്രമാത്രം.